సర్కారు వారి పాటను ముందే ప్లాన్‌ చేస్తున్నారట!

సూపర్‌ స్టార్‌ మహేష్‌ బాబు సర్కారు వారి పాట వచ్చే ఏడాది సంక్రాంతికి ప్రేక్షకుల ముందుకు రాబోతుంది. భారీ అంచనాలున్న ఈ సినిమాకు పరశురామ్‌ దర్శకత్వం వహిస్తున్నాడు. ఈ సినిమా షూటింగ్‌ కరోనా కారణంగా తాత్కాలికంగా ఆగింది. కరోనా సెకండ్‌ వేవ్ ప్రభావం కాస్త తగ్గిన తర్వాత షూటింగ్‌ ను మొదలు పెట్టబోతున్నట్లుగా తెలుస్తోంది. ఇక సర్కారు వారి పాట టీజర్ ను మహేష్‌ బాబు పుట్టిన రోజు సందర్బంగా విడుదల చేయాలని భావించారు. మే 31న మోషన్‌ పోస్టర్‌ ను తీసుకు రావాలనుకున్నారు. కాని మారిన ప్లాన్‌ ప్రకారం టీజర్ ను విడుదల చేయబోతున్నట్లుగా తెలుస్తోంది.

సర్కారు వారి పాట మేకర్స్ నుండి అందుతున్న అనధికారిక సమాచారం ప్రకారం మే 31న కృష్ణ పుట్టిన రోజు సందర్బంగా టీజర్ ను విడుదల చేయబోతున్నారట. ప్రస్తుతం షూటింగ్‌ కరోనా వల్ల నిలిచి పోయింది. దాంతో దర్శకుడు పరశురామ్‌ టీజర్ ను కట్‌ చేయించే పనిలో ఉన్నాడట. ఇప్పటి వరకు షూట్‌ చేసిన సన్నివేశాల నుండి 50 సెకన్ల టీజర్‌ ను విడుదల చేయాలని భావిస్తున్నారు. టీజర్ లా కాకున్నా మహేష్‌ బాబు పాత్ర ను పరిచయం చేసే విధంగా అయినా కృష్ణ పుట్టిన రోజున ఒక వీడియోను విడుదల చేయాలని మేకర్స్ భావిస్తున్నారట.

కీర్తి సురేష్ హీరోయిన్‌ గా నటిస్తున్న ఈ సినిమా పై అంచనాలు భారీగా ఉన్నాయి. గత ఏడాది మహేష్ బాబు సరిలేరు నీకెవ్వరు సినిమా తర్వాత చేస్తున్న సినిమా అవ్వడంతో అంచనాలు భారీగా ఉన్నాయి. ఈ ఏడాదిలోనే సినిమాను విడుదల చేసే అవకాశం ఉన్నా కూడా పరిస్థితులు పూర్తిగా చక్కబడి ప్రేక్షకులు మళ్లీ థియేటర్లకు పూర్తి స్థాయిలో అందుబాటులోకి వచ్చిన తర్వాత అంటే సంక్రాంతికి ఈ సినిమాను విడుదల చేయాలనే నిర్ణయానికి వచ్చారు.