రంభ రీ ఎంట్రీకి రంగం సిద్ధమైపోయినట్టే!

1990లలో తెలుగు తెరపై మెరిసిపోయిన గ్లామరస్ హీరోయిన్లలో రంభ ఒకరు. 'ఆ ఒక్కటీ అడక్కు' సినిమాతో తెలుగు తెరకి పరిచయమైన రంభ, తొలి సినిమాతోనే విజయాన్ని అందుకుంది. అందం .. అభినయం రెండింటిలోనూ ఆమె సౌందర్య - రోజా వంటి హీరోయిన్స్ తో పోటీపడింది. అప్పటివరకూ భారీ అందాలతో తెరపై సందడి చేసిన భామలలో ముందువరుసలో నిలిచింది. 'హిట్లర్' .. 'అల్లుడా మజాకా' .. ' బావగారూ బాగున్నారా' వంటి బ్లాక్ బస్టర్ హిట్లతో స్టార్ హీరోయిన్ గా చక్రం తిప్పేసింది. వరుస సినిమాలతో దూసుకుపోయింది.

తెలుగు సినిమా మాటల్లో .. పాటల్లో రంభ పేరు ఇప్పటికీ వినిపిస్తూనే ఉంటుంది. ఈ మధ్య శర్వానంద్ చేసిన ఒక సినిమాలో రంభ కటౌట్స్ ను వాడుతూ ఆమెపై ఒక సాంగ్ కూడా పెట్టారు. అంతగా ఆమె ప్రేక్షకులను ప్రభావితం చేసింది.

వివాహం తరువాత నటనకు దూరమైన ఆమె ఆ తరువాత కొంతకాలానికి, 'దేశముదురు' .. 'యమదొంగ' సినిమాల్లో స్పెషల్ సాంగ్స్ చేసింది. రంభ గ్లామర్ .. ఆమె జోరు ఎంతమాత్రం తగ్గలేదనడానికి నిదర్శనంగా ఆ పాటలు ఒక రేంజ్ లో జనంలోకి దూసుకుని పోయాయి. ఇప్పటికీ ఈ పాటలు ఆయా వేదికలపై సందడి చేస్తూనే ఉంటాయి.

అలాంటి రంభ మళ్లీ ఇంతకాలానికి రీ ఎంట్రీ ఇస్తుండటం విశేషం. ఒక తమిళ సినిమాతో ఆమె రీ ఎంట్రీ ఇస్తోంది. తమిళంలో కార్తి హీరోగా పీఎస్ మిత్రన్ 'సర్దార్' సినిమాను రూపొందిస్తున్నాడు. లక్ష్మణ్ కుమార్ నిర్మిస్తున్న ఈ సినిమాకి జీవీ ప్రకాశ్ కుమార్ సంగీతాన్ని సమకూర్చాడు. రాశి ఖన్నా .. రజీషా విజయన్ ఈ సినిమాలో కథానాయికలుగా కనువిందు చేయనున్నారు. ఈ సినిమాలో ఒక కీలకమైన పాత్ర కోసం రంభను తీసుకున్నారు. ఆమె పాత్ర హైలైట్ గా నిలుస్తుందని చెబుతున్నారు. తమిళంతో పాటు తెలుగులోను ఈ సినిమా ప్రేక్షకుల ముందుకు రానుంది.

ఇక ఇదే సమయంలో తెలుగులో సైతం ఆమె రీ ఎంట్రీకి సమయం ఆసన్నమైందని అంటున్నారు. మహేశ్ బాబు హీరోగా త్రివిక్రమ్ ఒక సినిమా చేయనున్నారు. ప్రస్తుతం అందుకు సంబంధించిన సన్నాహాలు జరుగుతున్నాయి. త్రివిక్రమ్ ఈ సినిమాలో ఒక కీలకమైన పాత్ర కోసం రంభను తీసుకున్నారని అంటున్నారు.

ఇలా సీనియర్ హీరోయిన్స్ ను తీసుకోవడం త్రివిక్రమ్ కి అలవాటే. నదియా .. ఖుష్బూ .. టబు .. స్నేహ .. సుకన్య అలా ఎంట్రీ ఇచ్చినవారే. రీ ఎంట్రీలో రంభ ఎంతవరకూ బిజీ అవుతుందో చూడాలి మరి!