మహేష్ తో కూడా సీక్వెల్ మొదలెట్టేట్లున్నాడు

అనీల్ రావిపూడికు సీక్వెల్స్ అచ్చివచ్చేటట్లు ఉన్నాయి. ఇప్పటికే ఎఫ్ 3 చిత్రం సీక్వెల్ చేస్తున్న ఆయన త్వరలో రవితేజతో కూడా 'రాజా ది గ్రేట్' సీక్వెల్ ప్లాన్ చేస్తున్నట్లు సమాచారం. అసలే రవితేజ వరస హిట్స్ తో దూసుకుపోతున్నాడు. ఈ ఏడాది మొదట్లోనే 'క్రాక్' చిత్రంతో బ్లాక్ బస్టర్ హిట్ ను తన ఖాతాలో వేసుకున్నారు. 'రాజా ది గ్రేట్' తరువాత హిట్ కరువైన రవితేజకు మళ్ళీ మునుపటి జోష్ ను ఇచ్చింది 'క్రాక్' సినిమానే అని చెప్పాలి. అదే స్పీడ్ తో ఇప్పుడు వరుస చిత్రాలు సైన్ చేస్తున్నాడు రవితేజ.

క్రాక్ తర్వాత పెద్దగా గ్యాప్ లేకుండనే 'ఖిలాడి' ప్రాజెక్టును సెట్స్ పైకి తీసుకెళ్లాడు. ఈ సినిమా తరువాత ఆయన త్రినాథరావు నక్కిన .. శరత్ మండవ దర్శకత్వంలోని సినిమాలను లైన్లో పెట్టేశాడు. ఆ తరువాత ప్రాజెక్టుగా ఆయన ఒక సీక్వెల్ చేయనున్నట్టుగా తెలుస్తోంది. ఆ సీక్వెల్ సినిమానే 'రాజా ది గ్రేట్'.

ఇప్పటికే 'రాజా ది గ్రేట్' సీక్వెల్ కోసం అనిల్ రావిపూడి సన్నాహాలు మొదలెట్టారట. స్క్రిప్టు వర్క్ స్టార్ట్ చేసారట. ఇటీవల రవితేజను కలిసి స్టోరీ లైన్ ను వినిపించారట అనిల్ రావిపూడి. అయితే రవితేజకు కూడా బేసిక్ లైన్ నచ్చడంతో పూర్తి స్క్రిప్ట్ తో రమ్మని అనిల్ రావిపూడితో చెప్పారట. అనిల్ రావిపూడి ప్రస్తుతం తాను చేస్తున్న ప్రాజెక్టులను పూర్తి చేశాక 'రాజా ది గ్రేట్' సీక్వెల్ ప్రారంభిస్తాడు. 'రాజా ది గ్రేట్' సీక్వెల్ వచ్చే ఏడాది చివర్లో కార్యరూపం దాల్చే అవకాశం ఉంది.

కాగా అనిల్ రావిపూడి, బాలకృష్ణ కాంబినేషన్ లో ఓ ప్రాజెక్ట్ రూపుదిద్దుకోనున్న విషయం తెలిసిందే. అవకాసం ఉంటే సరిలేరు నీకెవ్వరు సినిమాకు కూడా సీక్వెల్ ప్లాన్ చేసేటట్లు ఉన్నాడు అనీల్ రావిపూడి అంటున్నారు సినీ జనం. ఏమో అదే క్యారక్టర్ తీసుకుని అనీల్ రావిపూడి ..మహేష్ కు మరో కథని తయారు చేసి చెప్పినా ఆశ్చర్యం లేదు. హీరోలు కూడా హిట్ సినిమా సీక్వెల్ అంటే ఉత్సాహం చూపిస్తారు. జనం కూడా ఈ సారి ఏం చూపెట్టారో అని చూడ్డానికి ఆసక్తి చూపిస్తారు.