విడాకుల సబ్జెక్ట్‌ అనగానే చేయాలనుకున్నాను

సుమంత్‌ హీరోగా నైనా గంగూలీ మరియు వర్షిణి హీరోయిన్స్ గా రూపొందిన చిత్రం 'మళ్లీ మొదలైంది'. ఈ సినిమా ప్రారంభించిన సమయంలోనే అందరి దృష్టిని ఆకర్షించింది. సుమంత్‌ మళ్లీ పెళ్లి చేసుకోబోతున్నట్లు ప్రచారం చేసి సినిమా ను ప్రకటించడం ద్వారా అందరి దృష్టిని ఆకర్షించిన ఈ సినిమా విడుదలకు సిద్దం అయ్యింది. మళ్లీ రావా సినిమాతో మంచి విజయాన్ని సొంతం చేసుకున్న సుమంత్ మళ్లీ మొదలైంది సినిమాతో ఇప్పటికే జనాల్లో ఆసక్తిని కలిగించడంలో సక్సెస్ అయ్యాడు. ఈ సినిమా ను థియేటర్ రిలీజ్ కు ప్లాన్ చేసినా కూడా కొన్ని కారణాల వల్ల ఓటీటీ రిలీజ్ కు వెళ్లాల్సి వచ్చిందని యూనిట్‌ సభ్యులు ప్రకటించారు. ఈనెల 11న డైరెక్ట్‌ గా జీ5 ఓటీటీ ద్వారా ఈ సినిమా ను స్ట్రీమింగ్ చేయబోతున్నారు.

సినిమా విడుదల తేదీ దగ్గర పడుతుంది. ఈ సందర్బంగా చిత్ర యూనిట్‌ సభ్యులు మీడియా సమావేశం ఏర్పాటు చేశారు. ఈ సందర్బంగా హీరో సుమంత్‌ మాట్లాడుతూ విడాకుల గురించిన సబ్జెక్ట్‌ తో ఈ సినిమా కథ ఉంటుందని చెప్పగానే ఓకే చెప్పాను. కథ చెప్పే సమయంలోనే ఆ విషయాన్ని చెప్పడంతో వెంటనే చేయాలనుకున్నాను. కథ విన్న తర్వాత ఈ సబ్జెక్ట్‌ ను అస్సలు మిస్ అవ్వకూడదు అనుకున్నాను అంటూ సుమంత్ చెప్పుకొచ్చాడు. ఈ సినిమా కోసం అనూప్‌ మంచి పాటలు ఇచ్చాడు. నేను చేసిన ప్రేమ కథ మొదలుకుని నా ప్రతి సినిమాలో కూడా ఒక సిగ్నేచర్ సాంగ్ ఉంటుంది. ఇప్పుడు ఆ సిగ్నేచర్ సాంగ్ ను మళ్లీ మొదలైంది సినిమాలో కూడా పెట్టినట్లుగా చెప్పుకొచ్చాడు.

ఇప్పటికే విడుదల అయిన మళ్లీ మొదలైంది ట్రైలర్ ప్రేక్షకుల దృష్టిని ఆకర్షించింది. ఒక సీరియస్ సబ్జెక్ట్‌ ను ఫన్ స్క్రీన్‌ ప్లేతో చెప్పినట్లుగా అనిపించింది. కలిసి ఉండటం కష్టం అనిపించిన భార్య భర్తలు విడిపోయిన తర్వాత వారి మానసిక పరిస్థితి ఏంటీ.. ఆ తర్వాత వారి గురించి సమాజంలో అనుకునే మాటలు.. వారి గురించి జనాలు పుట్టించే పుకార్లను గురించి ఈ సినిమాలో చూపించడం జరిగింది. ఈ సినిమాలో సుమంత్ మొదటి భార్య గా వర్షిణి కనిపించగా ప్రియురాలిగా నైనా గంగూలీ నటించింది. రెండో పెళ్లి చేసుకుని కూడా మళ్లీ విడాకులు తీసుకునేందుకు సిద్దం అయ్యాడు అంటూ ట్రైలర్ లో హీరో పాత్రను చూపించడం జరిగింది. మొత్తానికి చాలా ఆసక్తికరంగా ఎంటర్‌ టైన్మెంట్‌ తో కూడిన కథనంతో సినిమా సాగుతుందని ట్రైలర్‌ తో చెప్పకనే చెప్పారు. కనుక జీ5 లో ఈ సినిమా స్ట్రీమింగ్‌ అయ్యి మంచి విజయాన్ని సొంతం చేసుకుంటుందేమో చూడాలి.