'దుబాయ్'లో షూటింగ్ సేఫ్ అంటున్న సూపర్ స్టార్!

సరిలేరు నీకెవ్వరూ సినిమా తర్వాత సూపర్ స్టార్ మహేష్ బాబు భారీ గ్యాప్ తీసుకొని సర్కారు వారి పాట సినిమా ప్రారంభించాడు. ఇటీవలే సర్కారు వారి పాట చిత్రీకరణ దుబాయ్ లో శరవేగంగా స్టార్ట్ చేశారు. ప్రస్తుతం చిత్రబృందం దుబాయ్ లో సర్కారు పాట కీలక సన్నివేశాలను చిత్రీకరిస్తోంది. అయితే తాజాగా సూపర్ స్టార్ మహేష్ దుబాయ్ స్థానిక మీడియాతో ఒక ప్రత్యేక ఇంటర్వ్యూలో పాల్గొన్నాడు.

ఈ సందర్బంగా మహేష్ మాట్లాడుతూ.. దుబాయ్ నగరంలో సురక్షితంగా షూటింగ్ జరుగుతుందని భావిస్తున్నట్లు చెప్పాడు. అలాగే ప్రపంచ దేశాలలో దుబాయ్ ఒక సుందరమైన ప్రదేశం. తాను గతంలో చాలాసార్లు దీనిని సందర్శించానని చెప్పుకొచ్చాడు. అలాగే షూటింగ్ జరుపుతున్నప్పుడు సిబ్బంది నగరంలో కోవిడ్ ప్రోటోకాల్ పాటిస్తూ సురక్షితంగా కేర్ తీసుకుంటున్నట్లు తెలిపాడు.

ప్రస్తుతం సూపర్ స్టార్ మహేష్ తన భార్య నమ్రత, పిల్లలు గౌతమ్, సితారలతో కలిసి దుబాయ్ నగరంలో ఉంటున్నాడు. దుబాయ్ లో షెడ్యూల్ జరిగినన్ని రోజులపాటు ఫ్యామిలీతో ఉంటాడట మహేష్. దుబాయ్ షెడ్యూల్ మరికొన్ని రోజులు కొనసాగనుంది. గీతగోవిందం ఫేమ్ పరశురామ్ దర్శకత్వం వహిస్తున్న ఈ సినిమాలో కీర్తిసురేష్ హీరోయిన్ గా నటిస్తోంది. ఈ సినిమాలో కీర్తి బ్యాంకు ఎంప్లాయిగా కనిపించనుందని టాక్.

అయితే సర్కారు వారి పాటకు సంగీతం తమన్ కంపోజ్ చేస్తున్నాడు. మహేష్ తమన్ కాంబినేషన్ లో వస్తున్న మూడో సినిమా ఇది. ఇక ఈ సినిమాను మైత్రి మూవీ మేకర్స్, జిఎంబి ఎంటర్టైన్మెంట్, 14 రీల్స్ ప్లస్ సంయుక్తంగా ఈ ప్రాజెక్టును భారీ బడ్జెట్ తో నిర్మిస్తున్నారు. మొత్తానికి ఈ ఏడాది మహేష్ నుండి ఈ సినిమా విడుదల అవ్వడం లేదు. ఈ సినిమాను 2022 సంక్రాంతికి విడుదల చేయనున్నట్లు ప్రకటించారు మేకర్స్.