ఆ ముగ్గురు చేతులు కలిపింది చరణ్ కోసమేనా..?

'ఆర్.ఆర్.ఆర్' సినిమాతో బిగ్గెస్ట్ బ్లాక్ బస్టర్ అందుకున్న మెగా పవర్ స్టార్ రామ్ చరణ్.. పాన్ ఇండియా క్రేజ్ ను సొంతం చేసుకున్నారు. ఇప్పుడు జాతీయ స్థాయిలో వచ్చిన ఇమేజ్ ను కాపాడుకుంటూ ముందుకు వెళ్లేందుకు చెర్రీ తన లైనప్ ని పర్ఫెక్ట్ గా ప్లాన్ చేసుకుంటున్నారు.

చరణ్ ప్రస్తుతం మావెరిక్ డైరెక్టర్ శంకర్ తో ఓ భారీ చిత్రం చేస్తున్న సంగతి తెలిసిందే. తాత్కాలికంగా RC15 అనే వర్కింగ్ టైటిల్ తో పిలవబడుతున్న ఈ ప్రాజెక్ట్ షూటింగ్ దశలో ఉంది. దిల్ రాజు నిర్మిస్తున్న ఈ పొలిటికల్ యాక్షన్ డ్రామాని పాన్ ఇండియా స్థాయిలో విడుదల చేయనున్నారు.

అయితే శంకర్ సినిమా తర్వాత రామ్ చరణ్ సినిమా ఏంటనే ఆసక్తి అందరిలో మొదలైంది. ముందుగా గౌతమ్ తిన్ననూరి దర్శకత్వంలో RC16 మూవీ చేయాలని అనుకున్నారు. కానీ తెలియని కారణాలతో ఆ ప్రాజెక్ట్ ని ప్రస్తుతానికి పక్కన పెట్టేసారు. దీంతో చెర్రీ నెక్స్ట్ సినిమా విషయంలో అనేక రూమర్స్ వస్తున్నాయి.

కన్నడ దర్శకుడు నార్తన్ తో చిరు తనయుడు ఓ సినిమా చేయనున్నట్లు చాలా రోజులుగా వార్తలు చక్కర్లు కొడుతున్నాయి. అయితే జీనియస్ డైరెక్టర్ సుకుమార్ తో చరణ్ మళ్ళీ జట్టు కట్టనున్నారనే న్యూస్ ఇప్పుడు సోషల్ మీడియాలో వైరల్ అవుతోంది.

రామ్ చరణ్ తో నెక్స్ట్ ప్రాజెక్ట్ కోసం సుకుమార్ ఇప్పటికే 10 నిమిషాల షూట్ కూడా కంప్లీట్ చేసినట్లు నివేదికలు పేర్కొన్నాయి. RRR ప్రమోషన్స్ లో రాజమౌళి సైతం సుక్కూ సినిమాలో చెర్రీ ఇంట్రడక్షన్ సీన్ గురించి ప్రస్తావించారు. రీసెంట్ గా ప్రొడక్షన్ డిజైనర్ సాబు సిరిల్ ఈ విషయాన్ని స్పష్టం చేసారు.

ఈ నేపథ్యంలో ఇటీవల పాన్ ఇండియా ఫిలిం మేకర్స్ సుకుమార్ - వివేక్‌ రంజన్‌ అగ్నిహోత్రి మరియు అభిషేక్ అగర్వాల్ ల కలయిక చరణ్ ప్రాజెక్ట్ కోసమే అనే రూమర్స్ వస్తున్నాయి. 'పుష్ప' డైరెక్టర్ - 'ది కశ్మీర్ ఫైల్స్‌' డైరెక్టర్‌ - 'కార్తికేయ 2' నిర్మాత ఒక ప్రాజెక్ట్ కోసం చేతులు కలుపుతున్నట్లు క్లారిటీ వచ్చింది.

"మన దేశంలోని ఇద్దరు జీనియస్ దర్శకులతో కలిసి పని చేయడం చాలా సంతోషంగా ఉంది.. ఇది చాలా విశేషమైనది. బ్లాక్ బస్టర్ డైరెక్టర్ సుకుమార్ మరియు వివేక్ అగ్నిహోత్రి అపూర్వమైనదాన్ని అందించడానికి సిద్ధంగా ఉన్నారు. భారతీయ సినిమా మళ్లీ ఎప్పటికీ అలాగే ఉండదు.. వేచి ఉండండి" అని అభిషేక్ ఆర్ట్స్ ట్వీట్ లో పేర్కొంది.

అయితే ఈ బిగ్గెస్ట్ ప్రాజెక్ట్ మరెవరితోనో కాదు.. RRR స్టార్ రామ్ చరణ్ తోనే ఉంటుందనే టాక్ ఇప్పుడు నడుస్తోంది. నిజానికి 'రంగస్థలం' తర్వాత సుకుమార్ మరియు చెర్రీ మరో సినిమా చేయనున్నట్లు మైత్రీ మూవీ మేకర్స్ నిర్మాతలు ఓ సందర్భంలో తెలిపారు. అది వాళ్ళ బ్యానర్ లోనే ఉంటుందని పేర్కొన్నారు.

కానీ ఇప్పుడు అభిషేక్ అగర్వాల్ & వివేక్‌ అగ్నిహోత్రి నిర్మాణంలో సుక్కూ - చెర్రీ ప్రాజెక్ట్ ఉంటుందని ఊహాగానాలు ఊపందుకున్నాయి. త్వరలోనే దీనిపై స్పష్టత వస్తుందేమో చూడాలి. ఏదేమైనా 'పుష్ప' - RRR లతో పాన్ ఇండియా వైడ్ పాపులర్ అయిన సుకుమార్ - చరణ్ కాంబోలో సినిమా అంటే ఈసారి బాక్సాఫీస్ బద్దలే అని ఫ్యాన్స్ కామెంట్స్ చేస్తున్నారు.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.