నా చుట్టూ ఎనర్జీ ఉంది .. ఈ సినిమా చుట్టూ బజ్ ఉంది!

కొత్త హీరోలకు .. కొత్త దర్శకులకు ఈ మధ్య కాలంలో ప్రోత్సాహం పెరుగుతూ పోతోంది. ఓ మాదిరి బడ్జెట్ తో కూడిన సినిమాలను నిర్మిస్తూ, కొత్త టాలెంట్ కి అల్లు అరవింద్ .. దిల్ రాజు అవకాశాలను ఇస్తూ వెళుతున్నారు. సితార బ్యానర్ కూడా ఆ దిశగా అడుగులు వేస్తూ, 'డీజే టిల్లు' సినిమాను నిర్మించింది. సిద్ధు జొన్నలగడ్డ హీరోగా .. నేహా శెట్టి హీరోయిన్ గా ఈ సినిమా రూపొందింది.

ఈ నెల 12వ తేదీన ఈ సినిమాను థియేటర్లలో విడుదల చేయనున్నారు. ఈ నేపథ్యంలో ఈ సినిమా ప్రీ రిలీజ్ ఈవెంట్ ను నిర్వహించారు.

ఈ వేదికపై సిద్ధు మాట్లాడుతూ .. "ఈ సినిమాలో నాతో పాటు చేసిన అమ్మాయి పేరు నేహా శెట్టి. కొన్ని కారణాల వలన ఆమె ఈ రోజున ఇక్కడికి రాలేకపోయింది. ఆమె ఇక్కడికి రాకపోవడం వలన మా టీమ్ చాలా ఎనర్జీని మిస్సవుతున్నాము. ఈ మధ్య నేను కొత్తగా కొన్ని మాటలు వింటున్నాను. బుకింగ్స్ అంటున్నారు .. థియేట్రికల్ బిజినెస్ అంటున్నారు .. బ్రేక్ ఈవెన్ అంటున్నారు. వాటి గురించి అడిగితే 'నీకు అర్థమై చావదు' అంటున్నారు. 'గుంటూరు టాకీస్' తరువాత నేను బ్రేక్ తీసుకున్నాను. ఆ తరువాత థియేటర్లలో విడుదలవుతున్న నా సినిమా ఇది.

నా చుట్టూ ఒక బజ్ ఉంది .. ఎనర్జీ వుంది. మొత్తానికైతే నడుస్తుంది. ఈ నెల 12వ తేదీన మీరంతా థియేటర్స్ కి వస్తారు .. ఈ సినిమా చూస్తారు .. నాకు ఆ నమ్మకం ఉంది. సితార వంటి ఒక పెద్ద బ్యానర్లో సినిమా చేయడం చాలా ఆనందంగా ఉంది. ఇది ఒక అందమైన అనుభవంగా మిగిలిపోనుంది. సితార వంశీ గారు కాస్త కోపంగా కనిపిస్తారు. కానీ అడిగినవన్నీ ఇస్తూనే ఉంటారు. వంశీ గారితో కలిసి వర్క్ చేయడం చాలా క్రేజీ జర్నీ. త్రివిక్రమ్ శ్రీనివాస్ గారితో కలిసి ఈ సినిమాకి పని చేయడం సంతోషాన్ని కలిగించింది. ఆయన మాకు ఒక గైడు మాదిరిగా నిలిచారు.

తమన్ గారు ఈ సినిమాకి బ్యాక్ గ్రౌండ్ స్కోర్ ఇచ్చారు. ఒక పెద్ద హీరో సినిమాకి కొట్టినట్టుగా ఆయన మాకు బ్యాక్ గ్రౌండ్ స్కోర్ ఇచ్చారు. అందుకు ఆయనకి థ్యాంక్స్ చెబుతున్నాను. ఈ నెల 12వ తేదీన ఈ సినిమా థియేటర్లకు వస్తోంది. అందరూ చూసి ఎంజాయ్ చేయండి. ఈ సందర్భంగా ఈ సినిమాలోని నా డైలాగ్ ఒకటి చెబుతాను.

"ఏవంటే ఏం చెప్పాల్రా మార్కస్ .. ఒక ల్యాండు ఉంది .. అది మన సొంతం .. మన పర్సనల్ అనుకున్నాను నేను. కాకపోతే అది ఊళ్లోని వాళ్లందరి పేర్ల మీద ఉంది. ఏం చేస్తాం .. అదేదో సెటిల్మెంట్ చూడటానికి హోటల్ కి పోతున్నాను"అంటూ ముగించాడు.