'భాగమతి' హిందీ రీమేక్ ఎక్కడి దాకా వచ్చింది...?

'ఆకాశ రామన్న' సినిమాతో డైరెక్టర్ గా పరిచయమయ్యాడు జి. అశోక్. నేచురల్ స్టార్ నాని తో 'పిల్ల జమిందార్' సినిమా తీసి సూపర్ సక్సెస్ అందుకున్నాడు. ఈ సినిమా నాని కెరీర్ కి ఎంతటి బూస్ట్ ఇచ్చిందో ప్రత్యేకంగా చెప్పనవసరం లేదు. దీంతో క్రేజీ డైరెక్టర్ గా మారిపోయిన అశోక్.. ఆ తర్వాత ఆది సాయికుమార్ తో 'సుకుమారుడు'.. అంజలి ప్రధాన పాత్రలో 'చిత్రాంగధ' అనే సినిమాలు తెరకెక్కించాడు. అయితే ఈ రెండు సినిమాలు బాక్సాఫీస్ వద్ద నిరాశ పరిచాయి. ఈ క్రమంలో స్టార్ హీరోయిన్ అనుష్కతో 'భాగమతి' అనే లేడీ ఓరియెంటెడ్ హారర్ సినిమా తీసి బ్లాక్ బస్టర్ అందుకున్నాడు. యూవీ క్రియేషన్స్ బ్యానర్ లో ద్విభాషా చిత్రంగా రూపొందిన 'భాగమతి' ఆ ఏడాది మీడియం బడ్జెట్ సినిమాల్లో అత్యధిక లాభాలు తెచ్చిపెట్టిన చిత్రంగా నిలిచింది. దీంతో డైరెక్టర్ అశోక్ కి స్టార్ హీరోల నుంచి పిలుపొచ్చిందని వార్తలు వచ్చాయి.

అయితే అశోక్ మాత్రం 'భాగమతి' సినిమాని హిందీలో రీమేక్ చేయడానికి నిర్ణయించుకున్నాడు. ఈ నేపథ్యంలో టీ సిరీస్ భూషణ్ కుమార్ - బాలీవుడ్ హీరో అక్షయ్ కుమార్ - విక్రమ్ మల్హోత్రా 'దుర్గావతి' పేరుతో ఈ చిత్రాన్ని నిర్మిస్తున్నట్లు ప్రకటించారు. టైటిల్ రోల్ లో బాలీవుడ్ బ్యూటీ భూమి పడ్నేకర్ నటించబోతుందని వెల్లడించారు. గతేడాది నవంబర్ లో అనౌన్మెంట్ చేసిన తర్వాత ఈ సినిమాకి సంబంధించి ఎలాంటి అప్డేట్ ఇవ్వలేదు. దీంతో ఈ ప్రాజెక్ట్ ని పక్కన పెట్టేశారేమో అనే అనుమానాలు రేకెత్తాయి. మరి 'దుర్గావతి' సినిమాపై త్వరలోనే ఏదొక అప్డేట్ ఇచ్చి ఈ ప్రాజెక్ట్ లైవ్ లో ఉందని తెలిసేలా చేస్తారేమో చూడాలి. ఇక నాని అప్పట్లో అశోక్ తో మరొక సినిమా చేస్తానని మాటిచ్చాడట. రాబోయే రోజుల్లో నాని - అశోక్ కాంబోలో మరో సినిమా ఉంటుందేమో చూడాలి.