ఎన్టీఆర్ విష‌యంలో త‌ప్పు జ‌రిగింది.. మ‌హేష్ విష‌యంలో జ‌ర‌గొద్దట‌!

ఒక సినిమా అనౌన్స్ చేసింది మొద‌లు.. అది రిలీజ్ అయ్యే వ‌ర‌కు.. మ‌ధ్య‌లో ఏం జ‌రుగుతుందో ఎవ్వ‌రూ చెప్ప‌లేరు. ఆచితూచి లెక్క‌లు వేసుకున్న‌ప్ప‌టికీ.. ప‌రిస్థితులు క‌లిసిరాలేదంటే, అవ‌న్నీ చెరిపేసుకొని కొత్త‌వి రాసుకోవాలి. ఇప్పుడు ఎన్టీఆర్‌-త్రివిక్ర‌మ్ విష‌యంలో ఇదే జ‌రుగుతోంది.

‘అర‌వింద స‌మేత’ చిత్రం తర్వాత వీరిద్దరి కాంబోలో మరో చిత్రం రాబోతున్న విషయం తెలిసిందే. గతేడాది సంక్రాంతికి ‘అలవైకుంఠ పురములో’ రిలీజ్ అయిన తర్వాత నుంచి.. ఎన్టీఆర్ సినిమా కోసమే వేచి ఉన్నాడు త్రివిక్రమ్. కానీ.. RRR చిత్రీక‌ర‌ణ ఇంకా ముగియ‌నే లేదు. క‌రోనా కార‌ణంగా ఏకంగా మూడు సార్లు రిలీజ్ డేట్లు మార్చుకుందీ సినిమా. మ‌ధ్య మ‌ధ్య‌లో ఇది కూడా మారుతుందా? అనే వార్త‌లు కూడా వ‌స్తున్నాయి.

RRR చిత్రీక‌ర‌ణ‌ను జూనియ‌ర్ ఫినిష్ చేస్తే.. అప్పుడు త్రివిక్ర‌మ్ సినిమా మొద‌ల‌వుతుంది. మే నుంచి రెగ్యుల‌ర్ షూట్ కు ప్లాన్ చేస్తున్నార‌నే ప్ర‌చారం కూడా సాగుతోంది. ఈ ప‌రిస్థితుల్లో దాదాపు ఏడాదికి పైగా ఖాళీగా ఉన్నాడు తివిక్ర‌మ్‌. ఈ స‌మయాన్ని ఏకే రీమేక్ వంటి చిత్రాల‌కు మాట‌లు రాయ‌డానికి, స్క్రీన్ ప్లే అందించ‌డానికి కేటాయిస్తూ న‌డిపిస్తున్నాడు.

అయితే.. ఇలాంటి పొర‌పాటు పున‌రావృతం కావొద్ద‌ని నిర్ణ‌యించుకున్నాడ‌ట మాట‌ల మాంత్రికుడు. మ‌హేష్‌-త్రివిక్ర‌మ్ కాంబోలో హ్యాట్రిక్ సినిమాకు ప్లాన్ జ‌రుగుతోంది. దీన్ని అనౌన్స్ చేయాల‌ని ప్రిన్స్ కోరుతున్నాడ‌ట‌. అయితే.. తివిక్ర‌మ్ మాత్రం తొంద‌ర‌ప‌డట్లేద‌ట‌.

RRR త‌ర్వాత‌ రాజ‌మౌళి మ‌హేష్ తో సినిమా చేయ‌బోతున్న విష‌యం తెలిసిందే. అనౌన్స్ కూడా అయ్యింది. కానీ.. ఎప్పుడు మొద‌ల‌వుతుందో తెలియ‌దు. మొద‌లైతే.. ఎప్పుడు ముగుస్తుందో చెప్ప‌డం క‌ష్టం. అందుకే.. RRR త‌ర్వాత జ‌క్క‌న్న లాంగ్ బ్రేక్ తీసుకుంటారా? వెంటనే మహేష్ మూవీ మొదలు పెడతారా? అనే క్లారిటీ కోసం వెయిట్ చేస్తున్నాడ‌ట త్రివిక్ర‌మ్‌. వ‌చ్చే స‌మాధానాన్ని బ‌ట్టి.. ప్రిన్స్ తో త‌న మూవీని ప్లాన్ చేసుకోవాల‌ని చూస్తున్నాడ‌ట‌. మ‌రి, ఏం జ‌రుగుతుంద‌న్న‌ది చూడాలి.