ఆరంభంలోనే పుకార్లు పుట్టుకొచ్చాయి..!

సూపర్ స్టార్ మహేశ్ బాబు మరియు త్రివిక్రమ్ శ్రీనివాస్ కాంబినేషన్ లో ఇటీవల SSMB28 సినిమా రెగ్యులర్ షూటింగ్ ప్రారంభించిన సంగతి తెలిసిందే. హైదరాబాద్ లో మహేష్ మీద ఓ హై వోల్టేజ్ యాక్షన్ సీక్వెన్స్ ని చిత్రీకరించారు. దీనికి సంబంధించిన ఓ గ్లిమ్స్ ని కూడా మేకర్స్ వదిలారు.

ఎపిక్ యాక్షన్ ఎంటర్టైనర్ గా తెరకెక్కుతున్న ఈ సినిమాలో మహేష్ మాస్సీ రగ్గుడ్ అవతార్‌ లో కనిపించనున్నారు. దీని కోసం ఎన్నడూ చూడని విధంగా గడ్డం మీసాలను మెయింటైన్ చేస్తున్నారు. దీంతో అసలు ఈ చిత్రంలో సూపర్ స్టార్ క్యారక్టర్ ఏంటనే చర్చ మొదలైంది.

SSMB28 లో మహేష్ ఒక పోలీసాఫీసర్ గా కనిపించనున్నారని ఊహాగానాలు వచ్చాయి. ఆ తర్వాత పోలీస్ కాదు.. స్పెషల్ ఏజెంట్ గా నటిస్తున్నాడని అన్నారు. ఓపెనింగ్ డే నాడు రిలీజ్ చేసిన ప్రమోషనల్ వీడియోలో యాక్షన్ ప్యాక్ వైబ్ ఉండటంతో హీరో పాత్ర ఎలా ఉంటుందనే ఆసక్తి అందరిలో ఎక్కువైందని చెప్పాలి.

ఇదిలా ఉంటే ఫస్ట్ షెడ్యూల్ లో షూట్ చేసిన యాక్షన్ సీన్స్ అవుట్‌ పుట్‌ పై త్రివిక్రమ్ మరియు మహేష్‌ లు సంతృప్తి చెందలేదని రూమర్స్ వస్తున్నాయి. అందుకే ఈ నెలాఖరు వరకు జరగాల్సిన షెడ్యుల్ ని రద్దు చేసుకున్నారని.. ఫైట్ మాస్టర్స్ ని మార్చేసే ఆలోచన కూడా చేస్తున్నారని గాసిప్స్ వచ్చాయి.

'కేజీఎఫ్' 'విక్రమ్' చిత్రాలకు వర్క్ చేసిన ఫైట్ మాస్టర్స్ ద్వయం అన్బు అరివ్‌ లను SSMB28 కోసం తీసుకున్న సంగతి తెలిసిందే. వీరిద్దరి పర్యవేక్షణలోనే ఇటీవలి యాక్షన్ ప్యాక్డ్ షెడ్యూల్ షూటింగ్ జరిగింది. అయితే దీనిపై సంతృప్తి చెందకపోవడంతో ఇప్పుడు ఫైట్ మాస్టర్స్ ని కొనసాగించాలా లేదా మరొకరిని తీసుకోవాలా అనే దానిపై ఉన్నత స్థాయి చర్చ జరుగుతోందని రూమర్స్ స్ప్రెడ్ అయ్యాయి.

అయితే మనకు తెలిసిన ప్రకారం.. ఈ వార్తల్లో ఎలాంటి నిజం లేదని తెలుస్తోంది. ఇప్పటికే అన్నపూర్ణ స్టూడియోస్ మరియు రామోజీ ఫిల్మ్ సిటీలో యాక్షన్ సీక్వెన్స్ షూటింగ్ జరిపారు. మిగిలిన భాగాన్ని ఒక వారం విరామం తర్వాత అదే యాక్షన్ కొరియోగ్రాఫర్స్ అన్బరివ్ లతో షూట్ చేస్తారని సమాచారం అందుతోంది.

SSMB28 అనేది మహేష్ మరియు త్రివికమ్ కాంబోలో తెరకెక్కుతున్న హ్యాట్రిక్ మూవీ. ఇంతకుముందు 'అతడు' 'ఖలేజా' వంటి సినిమాలు కలిసి చేశారు. దాదాపు 12 ఏళ్ల కాలం తర్వాత ఈ ప్రాజెక్ట్ కోసం కలుస్తుండంతో అందరిలో అంచనాలు నెలకొన్నాయి. అదే సమయంలో షూటింగ్ మొదలైన వెంటనే పుకార్లు కూడా పుట్టుకొస్తున్నాయి.

ఇందులో మహేశ్ బాబు సరసన పూజా హెగ్డే హీరోయిన్ గా నటిస్తోంది. త్వరలో మిగతా నటీనటుల వివరాలు వెల్లడి కానున్నాయి. హారిక అండ్ హాసిని క్రియేషన్స్ బ్యానర్ పై కె రాధాకృష్ణ (చిన్నబాబు) ఈ చిత్రాన్ని భారీ బడ్జెట్ తో ప్రతిష్టాత్మకంగా నిర్మిస్తున్నారు.

ఎస్ థమన్ సంగీతం సమకూరుస్తున్నారు. పీఎస్ వినోద్ సినిమాటోగ్రఫీ అందిస్తుండగా.. ఏఎస్ ప్రకాష్ ప్రొడక్షన్ డిజైనింగ్ చేస్తుండగా.. నవీన్ నూలి ఎడిటింగ్ బాధ్యతలు నిర్వహిస్తున్నారు. SSMB28 చిత్రాన్ని 2023 ఏప్రిల్ 28న విడుదల చేయనున్నట్లు మేకర్స్ ప్రకటించారు.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.