ఫస్ట్ లుక్: కండలు తిరిగిన మీసం

చేసే ప్రతి సినిమాలోనూ ఏదో ఒక వైవిధ్యం ఉండేలా చూసుకుంటున్న హీరో శ్రీవిష్ణు కొత్త మూవీ తిప్పరా మీసం. రేపు టీజర్ విడుదల కాబోతున్న సందర్భంగా ఫస్ట్ లుక్ పోస్టర్ ని రిలీజ్ చేశారు. ఇందులో మెచో మ్యాన్లీ లుక్ తో శ్రీవిష్ణు చాలా రఫ్ గా ఇంకా చెప్పాలంటే ఊర మాస్ అవతారంతో ఈసారి పెద్ద టార్గెట్ ఏదో పెట్టినట్టు కనిపిస్తున్నాడు. అసురతో విమర్శకుల ప్రశంసలు పొందిన దర్శకుడు కృష్ణ విజయ్ దర్శకత్వం వహిస్తున్న తిప్పరా మీసంలో నిక్కీ తంబోలి హీరోయిన్ గా నటిస్తోంది.

ఇప్పటికే షూటింగ్ మొత్తం పూర్తి చేసుకున్న తిప్పరా మీసం పోస్ట్ ప్రొడక్షన్ పనుల్లో ఉంది. విడుదల తేదీ త్వరలోనే ప్రకటించబోతున్నారు. ప్రతి సినిమాకు కొంత గ్యాప్ వస్తున్నా సబ్జెక్టుల ఎంపికలో ఆచితూచి అడుగులు వేస్తున్న శ్రీవిష్ణు ఇటీవలే బ్రోచేవారెవరురాతో మరో సక్సెస్ తన ఖాతాలో వేసుకున్నాడు.

ఇప్పటిదాకా సాఫ్ట్ రోల్స్ కే పరిమితమైన ఈ యంగ్ హీరో తిప్పరా మీసం కోసం బారుడు గెడ్డం పెంచి టైటిల్ కు తగ్గట్టు పొడవైన మీసం కూడా మైంటైన్ చేశాడు. కథ పరంగా ఎలాంటి లీక్స్ లేకుండా టీమ్ జాగ్రత్త పడింది. రేపు టీజర్ వచ్చాక లైన్ గురించి ఒక ఐడియా రావొచ్చు. కండలు తిరిగిన దేహం బంగాళాదుంప సైజు మీసం చూస్తుంటే ఈసారి శ్రీవిష్ణు ఫోకస్ మార్చినట్టు కనిపిస్తోంది. టైటిల్ కూడా మాస్ కనెక్ట్ అయ్యేలా పెట్టడంతో రేపు టీజర్ తో ఆసక్తి ఏ స్థాయిలో పెరుగుతుందో చూడాలి