న‌క్క తోక తొక్కిన ర‌ష్మిక .. ఏంటీ ఆఫ‌ర్ల క్యూ!

చూస్తుంటే ర‌ష్మిక న‌క్క తోక తొక్కిన‌ట్టే క‌నిపిస్తోంది. ఓవైపు టాలీవుడ్ లో ప‌లు క్రేజీ చిత్రాల్లో న‌టిస్తూనే మ‌రోవైపు బాలీవుడ్ లో వ‌రుస సినిమాల‌తో బిజీ అయిపోతోంది. అప్పుడే త‌న మూడో బాలీవుడ్ చిత్రానికి ర‌ష్మిక సంత‌కం చేసింద‌ని స‌మాచారం. సోమవారం తన ఇన్ స్టాగ్రామ్ లైవ్ సెషన్ లో ఈ విష‌యాన్ని ర‌ష్మిక స్వ‌యంగా వెల్ల‌డించారు. అక్కడ ఆమె తన మూడవ బాలీవుడ్ చిత్రానికి సంతకం చేయడానికి సిద్ధంగా ఉన్నాన‌ని చెప్ప‌క‌నే చెప్పారు.

రష్మిక తన తొలి చిత్రం ముగిసేలోపు బాలీవుడ్లో తన రెండవ చిత్రానికి సంతకం చేసింది. `టాప్ టక్కర్` వీడియోతో ర‌ష్మిక ఎంట్రీ అదిరింది. స్పై థ్రిల్లర్ మిషన్ మజ్ను తో ఆమె బాలీవుడ్ లోకి అడుగుపెడుతున్న ర‌ష్మిక‌.. ద్వితీయ ప్ర‌య‌త్న‌మే అమితాబ్ బచ్చన్ నటించిన `గుడ్ బాయ్‌`లో అవ‌కాశం అందుకుంది. ఈ చిత్రంలో అమితాబ్- ర‌ష్మిక తండ్రి కూతుళ్లుగా క‌నిపిస్తారు.

ఇంటరాక్టివ్ సెషన్లో ఒక అభిమాని ఆమె ఇతర బాలీవుడ్ ప్రాజెక్టుల గురించి అడిగినప్పుడు ``నేను రెండు బాలీవుడ్ సినిమాలు చేస్తున్నాను. త్వరలో మూడవ చిత్రానికి సంతకం చేయబోతున్నాను`` అని ఆమె సమాధానం ఇచ్చింది. అయితే అది ఎవ‌రితో అన్న‌ది వెల్ల‌డించ‌లేదు. తెలుగు కన్నడ చిత్రాల్లో తనదైన ముద్ర వేసిన‌ రష్మిక నేష‌న‌ల్ క్ర‌ష్ గా ఎదిగింది. అల్లు అర్జున్ తో పుష్ప లాంటి భారీ పాన్ ఇండియా చిత్రంలోనూ ర‌ష్మిక న‌టిస్తోంది. త‌దుప‌రి శంక‌ర్ - చ‌ర‌ణ్ సినిమాలోనూ న‌టించ‌నుంద‌ని ప్ర‌చారం సాగుతోంది.