'ఇదే మా కథ' టీజర్: బైక్ రైడర్స్ ఎమోషనల్ జర్నీ..!

యువ హీరో సుమంత్ అశ్విన్‌ - శ్రీ‌కాంత్‌ - భూమిక - తాన్యా హోప్ ప్రధాన పాత్రలతో తెరకెక్కుతున్న తాజా చిత్రం "ఇదే మా కథ". రోడ్ జ‌ర్నీ కాన్సెప్ట్‌ తో వస్తున్న ఈ చిత్రానికి గురు ప‌వ‌న్ ద‌ర్శ‌క‌త్వం వహించారు. శ్రీమతి మనోరమ గురప్ప సమర్పణలో గుర‌ప్ప ప‌ర‌మేశ్వ‌ర ప్రొడ‌క్ష‌న్స్ పతాకంపై జి.మ‌హేష్ ఈ చిత్రాన్ని నిర్మిస్తున్నారు. ఇప్పటికే విడుదలైన ఈ చిత్రానికి సంబంధించిన ఫస్ట్ లుక్ పోస్టర్ సినిమాపై ఆసక్తిని కలిగించింది.

నలుగురు ప్రధాన పాత్రధారులు రైడర్స్ గెటప్ లో బైక్ మీద రైడింగ్ కి వెళ్తున్నట్లు చూపించారు. ఇప్పటికే షూటింగ్ పూర్తి చేసుకున్న ఈ చిత్రం త్వరలోనే ప్రేక్షకుల ముందుకు రానుంది. ఈ నేపథ్యంలో తాజాగా 'ఇదే మా కథ' టీజర్ ని చిత్ర యూనిట్ విడుదల చేసింది.

'ప్రతి మనిషి లైఫ్ లో ఒక మెమరబుల్ జర్నీ ఉండాలి.. అలాంటి జర్నీలో మర్చిపోలేని పరిచయాలు ఉండాలి.. ఇంకా చెప్పాలంటే ప్రేమ కూడా ఉండాలి' అంటూ సుమంత్ అశ్విన్ - శ్రీకాంత్ చెప్పే వాయిస్ ఓవర్ తో ఈ టీజర్ ప్రారంభమైంది. నలుగురు వ్యక్తులు థ్రిల్ కోసం తీసుకున్న ఓ నిర్ణయం వల్ల వారి జీవితాల్లో ఎలాంటి పరిణామాలు చోటు చేసుకున్నాయనేదే 'ఇదే మా కథ' స్టోరీ అని అర్థం అవుతోంది.

ఈ ఎమోషనల్ జర్నీ రోడ్‌ మార్గం నేపథ్యంలో.. వైవిధ్యమైన స్క్రీన్ ప్లేతో సాగనుందని తెలుస్తోంది. సుమంత్ అశ్విన్ - శ్రీకాంత్ - భూమిక ఇప్పటివరకు పోషించని పాత్రల్లో కనిపిస్తున్నారు. దీనికి ఈ చిత్రానికి సినిమాటోగ్రాఫర్ సి.రామ్‌ ప్రసాద్‌ అందించిన విజువల్స్ బాగున్నాయి. ఈ చిత్రానికి సునీల్‌ కశ్యప్‌ సంగీతం సమకూరుస్తున్నాడు. సప్తగిరి - సమీర్‌ - సత్యం రాజేష్‌ - శ్రీజిత ఘోష్‌ - తివిక్రమ్‌ సాయి తదితరులు ఇతర పాత్రల్లో కనిపిస్తున్నారు.