'గాలి సంప‌త్‌' విషయంలో నేను ఇదే అనుకున్నాః అనిల్ రావిపూడి

స‌క్సెస్ ఫుల్ డైరెక్ట‌ర్ అనిల్ రావిపూడి ద‌ర్శ‌క‌త్వ ప‌ర్య‌వేక్ష‌ణ‌తోపాటు స్క్రీన్ ప్లేకూడా అందించిన చిత్రం 'గాలి సంప‌త్‌'. రాజేంద్ర ప్ర‌సాద్, శ్రీవిష్ణు వంటి కాస్టింగ్ తోడ‌వ‌డంతో ఈ మూవీపై మంచి అంచ‌నాలు నెల‌కొన్నాయి. శివ‌రాత్రి సంద‌ర్భంగా విడుద‌లైన జాతిర‌త్నాలు, శ్రీకారం చిత్రాల‌కు ఏ మాత్రం తీసిపోకుండా హైప్ తెచ్చుకుందీ చిత్రం. కానీ.. ఫ‌లితం మాత్రం ఎవ‌రూ ఊహించ‌ని విధంగా రావ‌డం అంద‌రినీ ఆశ్చ‌ర్యానికి గురిచేసింది. రూ.7 కోట్ల బ్రేక్ ఈవెన్ టార్గెట్ తో విడుద‌లైన ఈ సినిమా క‌నీస స్థాయిలో కూడా క‌లెక్ష‌న్స్ రాబ‌ట్ట‌లేక‌పోయింది.

లేటెస్ట్ గా ఈ విష‌యంపై స్పందించాడు అనిల్. 'ఆలీతో స‌ర‌దాగా' ప్రోగ్రామ్ లో పాల్గొన్న అనిల్ గాలిసంపత్ తోపాటు ఇంకా పలు విషయాలు షేర్ చేసుకున్నారు. హీరో రామ్ గురించి కూడా ఇంట్ర‌స్టింగ్ అప్డేట్ ఇచ్చారు. 'గాలిసంప‌త్‌' సినిమాకు సంబంధించి లాభాల లెక్కలు వేసుకోలేదన్నారు. తన స్నేహితుడు రాసిన కథకు న్యాయం చేయాలని మాత్రమే చూశానని చెప్పారు అనిల్.

ఇక‌, త‌న గ‌త చిత్రం 'రాజా ది గ్రేట్‌' గురించి ఓ ఇంట్రస్టింగ్ విష‌యం చెప్పారు అనిల్. వాస్త‌వానికి ఈ సినిమా హీరో రామ్ కోసం రాసుకున్న‌ట్టు తెలిపారు. కానీ.. అప్ప‌టికే రామ్ యాక్ష‌న్ ఎంట‌ర్ టైన‌ర్ 'హైపర్'తోపాటు మరో సినిమాలోనూ నటించారని చెప్పారు. రాజా ది గ్రేట్ కూడా సేమ్ జోనర్ కావడంతో.. సాధ్యం కాలేదని అన్నారు.అయితే.. త్వరలో రామ్ తో సినిమా తీస్తానని మాత్రం చెప్పారు అనిల్. కాగా.. రామ్ ఇప్పుడు తమిళ్ దర్శకుడు లింగు స్వామితో సినిమా ప్రకటించిన విషయం తెలిసిందే. మరి, ఈ మూవీ తర్వాత వీరిద్దరి కాంబోలో చిత్రం వస్తుందేమో చూడాలి.