టాప్ స్టోరి: దేశంపై ప‌డ్డ గ‌జ‌దొంగ‌లు!

మిలియ‌న్ డాల‌ర్ వ‌ర‌ల్డ్ .. బిలియ‌న్ ట్రిలియ‌న్ డాల‌ర్ వ‌ర‌ల్డ్‌ గా మారుతోంది! సినీప్ర‌పంచం విస్త్ర‌తి అంత‌కంత‌కు పెరుగుతోంది. ఇలాంటి వేళ బాలీవుడ్ వాళ్లు టాలీవుడ్ పై ప‌డుతున్నారా? అంటే గ‌్యారెంటీగా అని చెప్పొచ్చు. ఇదిగో ఇదే ప్రూఫ్‌.

``హ‌లో నా పేరు అమితాబ్ బ‌చ్చ‌న్ .. హ‌లో నా పేరు అమీర్ ఖాన్‌.. మేమిద్ద‌రం క‌లిసి మొద‌టి సారిగా మా నెక్ట్స్ మూవీ య‌శ్‌ రాజ్ ఫిలింస్ `థ‌గ్స్ ఆఫ్ హిందూస్తాన్‌`తో వ‌స్తున్నాం. ఈ స్పెష‌ల్ ఫిలింని మీతో షేర్ చేద్దామ‌నుకుంటున్నాం. ఈ దీపావ‌ళికి థ‌గ్స్ వ‌స్తున్నారు. సినిమా హాల్స్‌లో క‌లుద్దాం`` అంటూ పెద్ద షాకిచ్చారు ఆ దొంగ‌లిద్ద‌రూ. ఇంత‌కీ వీళ్లు దొంగ‌లా అంటే కానేకాదు.. అంత‌కుమించి.. గ‌జ‌దొంగ‌లు.. బందిపోట్లు!! వంద‌ల‌కోట్ల వ‌సూళ్ల‌ను కొల్ల‌గొట్టే గ‌జ‌కంత్రీ బందిపోట్లు.

2018 మోస్ట్ అవైటెడ్ మూవీగా ప్ర‌చారం అవుతున్న `థ‌గ్స్ ఆఫ్ హిందూస్తాన్` హీట్ అటు బాలీవుడ్‌ లోనే కాదు - ఇటు టాలీవుడ్‌ - కోలీవుడ్‌ ల‌ను ఒణికిస్తోంది. ఈ సినిమా తెలుగు - త‌మిళ‌ రిలీజ్ కి స్ఫూర్తి బాహుబ‌లి అన‌డంలో సందేహం లేదు. న‌వంబ‌ర్ 8న అత్యంత ప్ర‌తిష్ఠాత్మ‌కంగా హిందీ - తెలుగు - త‌మిళ వెర్ష‌న్ల‌ను రిలీజ్ చేస్తున్నామ‌ని ఏకంగా అమితాబ్ - అమీర్ అంత‌టి స్టార్లే లైన్‌ లోకొచ్చేశారంటే స‌న్నివేశం ఎలా ఉందో అర్థం చేసుకోవాలి. అమితాబ్ - అమీర్‌ ఖాన్ స్వ‌చ్ఛ‌మైన తెలుగు భాష‌లో మాట్లాడుతూ.. తెలుగు వాళ్ల‌కు పెద్ద బిస్కెట్టే వేశారు. దీపావ‌ళికి థియేట‌ర్ల‌లో క‌లుసుకుందాం అంటూ పెద్ద‌ షాకిచ్చారు. ఇక్క‌డ దోచుకున్న‌వాడికి దోచుకున్నంత‌. దొంగ‌త‌నంలో స్కిల్ తెలియాలంతే.