ఆ బయోపిక్ లో బెల్లంకొండ కాదు రవితేజ

గజదొంగ అయిన టైగర్ నాగేశ్వరరావు బయోపిక్ ను తెరకెక్కించబోతున్నట్లుగా గత కొన్ని ఏళ్లుగా మీడియాలో వార్తలు వస్తున్నాయి. మొదట నాని ప్రధాన పాత్రలో ఆ బయోపిక్ ను చేయబోతున్నట్లుగా వార్తలు వచ్చాయి. ఆ తర్వాత నాని కాదు మరో హీరో అంటూ కూడా ప్రచారం మొదలు అయ్యింది. చివరకు బెల్లంకొండ సాయి శ్రీనివాస్ ను టైగర్ నాగేశ్వరరావుగా చూపించేందుకు అంతా సిద్దం అయ్యారు. ఇక బెల్లంకొండ నటించబోతున్న బయోపిక్‌ కు సంబందించిన స్క్రిప్ట్‌ వర్క్ కూడా మొదలు అయ్యింది అంటూ వార్తలు వచ్చాయి. రేణు దేశాయ్ కూడా నటించేందుకు ఓకే చెప్పారు అని పుకార్లు షికార్లు చేశాయి. కాని బెల్లంకొండ ఇతర ప్రాజెక్ట్‌ లతో బిజీగా ఉండటం వల్ల టైగర్ నాగేశ్వరరావు బయోపిక్ ను పట్టాలెక్కించలేక పోయారు.

టైగర్‌ నాగేశ్వరరావు బయోపిక్ ను చేసేందుకు కమిట్ అయిన బెల్లంకొండ ప్రస్తుతం చత్రపతి సినిమా రీమేక్ లో బిజీగా ఉన్నాడు. ఆ సినిమా పూర్తి చేయడానికి చాలా సమయం పట్టేలా ఉంది. దాంతో బయోపిక్ ను చేతులు మార్చేలా ఉన్నారు. విశ్వసనీయంగా అందుతున్న సమాచారం ప్రకారం టైగర్ నాగేశ్వరరావు పాత్ర లో రవితేజ అయితే చాలా బాగా ఆకట్టుకుంటాడు అనే నమ్మకంను యూనిట్‌ వర్గాల వారు వ్యక్తం చేస్తున్నారు. అందుకే టైగర్‌ నాగేశ్వరరావు బయోపిక్‌ ను రవితేజ హీరోగా చేయాలనే నిర్ణయానికి వచ్చినట్లుగా వార్తలు వస్తున్నాయి.

అభిషేక్ అగర్వాల్‌ ఈ బయోపిక్ ను తెరకెక్కించేందుకు ఇప్పటికే స్క్రిప్ట్‌ వర్క్ ను చేయించారట. పాన్ ఇండియా మూవీగా ఈ సినిమాను ప్లాన్ చేస్తున్నట్లుగా తెలుస్తోంది. 1970 ల్లో అప్పటి ఆంద్రప్రదేశ్‌ పోలీసులకు చుక్కలు చూపించిన స్టూవర్ట్‌ పురం ఏరియా దొంగ టైగర్‌ నాగేశ్వరరావు. దొంగ అయినా కూడా స్థానికులు ఆయన్ను ఓ హీరో అన్నట్లుగా కీర్తించేవారు. పోలీసులు ఆయన్ను పట్టుకునేందుకు కొన్ని వందల సార్లు ప్రయత్నాలు చేసినా కూడా ప్రయోజనం లేకుండా పోయింది. ఎన్నో సార్లు పోలీసులకు చిక్కినట్లే చిక్కి కూడా పారిపోయిన ఘన చరిత్ర ఈయనకు ఉంది. అందుకే ఆయన బయోపిక్ ను తెలుగు లో తెరకెక్కించి అన్ని భాషల్లో కూడా విడుదల చేయాలని మేకర్స్ ప్లాన్‌ చేస్తున్నారు.

రవితేజ ప్రస్తుతం ఖిలాడి సినిమాను పూర్తి చేసి రామారావు ఆన్ డ్యూటీ సినిమా షూటింగ్‌ లో పాల్గొంటున్నాడు. ఈ ఏడాదిలో ఇప్పటికే క్రాక్‌ సినిమాతో ప్రేక్షకుల ముందుకు వచ్చిన రవితేజ ఆ తర్వాత బ్యాక్ టు బ్యాక్‌ సినిమాలను చేసేందుకు సిద్దం అవుతున్నాడు. బిగ్గెస్ట్‌ బ్లాక్‌ బస్టర్‌ మూవీగా క్రాక్‌ నిలవడంతో బ్యాక్ టు బ్యాక్‌ సినిమాలను రవితేజ కమిట్‌ అవుతున్నాడు. టైగర్ నాగేశ్వరరావు సినిమా షూటింగ్‌ ను కూడా ఇదే ఏడాదిలో ప్రారంభించేలా ప్రయత్నాలు చేస్తున్నారు. ఈ సినిమాకు సంబంధించిన విషయాలను అతి త్వరలోనే అధికారికంగా వెళ్లడించేలా ప్లాన్‌ చేస్తున్నారట. రవితేజ గతంలో దొంగగా నటించాడు. ఇప్పుడు మరో సారి టైగర్ నాగేశ్వరరావు పాత్రలో నటించడంతో ఖచ్చితంగా ఆకట్టుకుంటాడు అనే నమ్మకంను అభిమానులు వ్యక్తం చేస్తున్నారు.