టైగర్ చేతిలో డార్లింగ్ ఆఫర్!

'బాహుబలి' ఘన విజయం తర్వాత ప్రభాస్ క్రేజ్ బాలీవుడ్ లో ఆకాశాన్ని తాకుతోంది. అప్పట్లో ప్రభాస్ కు కొన్ని క్రేజీ ఆఫర్లు కూడా వచ్చాయని జోరుగా ప్రచారం సాగింది. యశ్ రాజ్ ఫిల్మ్స్ బ్యానర్ పై నిర్మించే ధూమ్ సిరీస్ చిత్రాలకు ప్రేక్షకుల్లో భారీ ఆదరణ ఉంది. ఇప్పటివరకు ఈ సిరీస్ లో మూడు సినిమాలు వస్తే మూడు సినిమాలు సంచలన విజయం సాధించాయి. ఈ సిరీస్ లో రానున్న నాలుగవ చిత్రానికి ప్రభాస్ ను సంప్రదించారని అన్నారు. కానీ ఇప్పుడు ఆ ఆఫర్ టైగర్ ష్రాఫ్ చేతికి వెళ్ళింది అని బాలీవుడ్ మీడియా కోడై కూస్తోంది.

'ధూమ్' సిరీస్ లో విలన్ పాత్రకు ప్రాధాన్యం ఎక్కువ. దాన్ని విలన్ పాత్ర అనే కంటే యాంటీ హీరో అనడం సబబు. ఈ సినిమాలో విలన్లు భారీ స్థాయిలో దొంగతనాలు చేస్తుంటారు. ఆ ఎపిసోడ్లు.. భారీ యాక్షన్ సీక్వెన్స్ లు చేజింగ్ లు చూస్తే ఎవరికైనా మతిపోతుంది. 'ధూమ్' సిరీస్ లో ఇప్పటి వరకు జాన్ అబ్రహం.. హృతిక్ రోషన్.. అమీర్ ఖాన్..ఇలా నెగెటివ్ రోల్ లో కనిపించి ప్రేక్షకులను మెప్పించారు. అయితే వరుసగా యాక్షన్ ప్రధానమైన చిత్రాలు చేసిన కారణంగా ప్రభాస్ మరోసారి ఈ భారీ చిత్రానికి ఆసక్తి చూపలేదట. అందుకే ఈ నాలుగవ భాగంలో ప్రభాస్ కు బదులుగా టైగర్ ష్రాఫ్ ను ఎంచుకున్నారు అని సమాచారం.

టైగర్ కు మొదటి నుంచి యాక్షన్ హీరో అని పేరు ఉంది. 'బాఘీ' సిరీస్.. ఈ మధ్య రిలీజ్ అయిన 'వార్' సినిమాలతో టైగర్ ష్రాఫ్ ప్రేక్షకులను మెప్పించాడు. మార్షల్ ఆర్ట్స్ తెలిసిన వ్యక్తి.. పైగా యాక్షన్ సినిమాలు చేయడం కొట్టినపిండి కావడంతో ఈ సినిమాకు కరెక్ట్ గా సరిపోతాడు అని అంటున్నారు. అయితే ప్రభాస్ ఈ సినిమా మిస్ చేసుకోవడం అభిమానులకు మాత్రం కాస్త నిరాశ కలిగిస్తుంది. ప్రభాస్ ప్రస్తుతం రాధాకృష్ణ కుమార్ దర్శకత్వంలో తెరకెక్కుతున్న సినిమాలో నటిస్తున్నాడు. ఈ సినిమా తర్వాత నాగ్ అశ్విన్ దర్శకత్వంలో ఒక భారీ బడ్జెట్ ఫిల్మ్ లో నటిస్తాడు.