టైగర్.. ఇది డేరింగ్ యవ్వారమే

బాలీవుడ్ లో వారసత్వ హీరోలకి డిమాండ్ బాగానే ఉంది. కుర్ర హీరోలు తండ్రుల స్టార్ స్టామినాను ఈజీగా అందుకొని వారికంటూ ఓ మార్కెట్ సెట్ చేసుకొని స్పీడ్ స్పీడ్ గా సినిమాలను చేస్తున్నారు. ప్రస్తుతం జయాపజయాలతో సంబంధం లేకుండా బాలీవుడ్ లో మంచి సినిమాలను చేస్తున్నాడు టైగర్ ష్రాఫ్. సీనియర్ నటుడు జాకీ ష్రాఫ్ కుమారుడు ఈ కుర్ర హీరో.

గత ఏడాది "భాగీ" అనే సినిమాతో ఈ హీరో మంచి హిట్ అందుకున్నాడు. మార్షల్ ఆర్ట్స్ నేపథ్యంతో తెరకెక్కిన ఆ సినిమా బాలీవుడ్ లో 100 కోట్ల క్లబ్ లో చేరి టైగర్ కి మంచి బూస్ట్ ని ఇచ్చింది. అయితే ఇప్పుడు అదే స్థాయిలో హిట్ కొట్టడానికి టైగర్ దానికి సీక్వెల్ గా భాగీ 2 తీయబోతున్నాడు. కాకపోతే గత కొన్ని నెలల క్రితం అనౌన్స్ చేసిన ఈ చిత్రం గురించి ఇంతవరకు ఎలాంటి విషయాన్ని బయటపెట్టలేదు. ప్రస్తుతం షూటింగ్ ను సీక్రెట్ గా చేస్తున్నట్లు తెలుస్తోంది. ఎందుకూ అంటే.. ఈ సినిమాలో మనోడు గుండు కొట్టించుకొని కనిపించనున్నాడు. జుట్టు అంటూ ప్రాణం ఇచ్చేసే స్టార్లు ఉన్న ఈరోజుల్లో మరి కేశాలను క్లీన్ షేవ్ చేసుకోవడం అనేది కూడా డేరింగ్ యవ్వారంగానే పరిగణించాలి మనం.

ఇకపోతే సినిమా ప్రీ లుక్ ని మాత్రం రిలీజ్ చేసి భారీ హైప్ ని తెచ్చింది. మంచి ఫిట్ నెస్ లుక్ తో స్టయిలిష్ గా రైఫిల్ ని పట్టుకొని అటువైపు తిరిగి ఉన్న టైగర్ అందరిని ఆకట్టుకుంటున్నాడు. చూస్తుంటే సినిమా మొదటి పార్ట్ కంటే అత్యున్నత స్థాయిలో తెరకెక్కుతున్నట్లు తెలుస్తోంది. ఇక ఈ సినిమాలో దిశా పటాని హీరోయిన్ గా నటిస్తుండగా అహ్మద్ ఖాన్ దర్శకత్వం వహిస్తున్నాడు. 2018 ఏప్రిల్ లో ఈ సినిమా విడుదల కానుంది.