టీజ‌ర్: శ‌త్రువు వేట‌లో తిప్ప‌రా మీసం

న‌వ‌త‌రంలో సైలెంట్ గా దూసుకొచ్చిన‌ ప్ర‌తిభావంతుడిగా శ్రీ విష్ణుని ఇండ‌స్ట్రీ గుర్తించింది. డిఫరెంట్ సినిమాలతో తనకంటూ ఒక సపరేట్ రూట్ సెట్ చేసుకున్న శ్రీ‌విష్ణు.. త‌న‌కంటూ ఓ వ‌ర్గం అభిమానుల్ని సంపాదించుకున్నాడు. ఎంపిక చేసుకునే ప్ర‌తి క‌థ‌లో ఏదో ఒక కొత్త‌ద‌నం.. నావల్టీ పాయింట్ అత‌డికి పెద్ద ప్ల‌స్ అవుతున్నాయి. ప్రతి సినిమాలో ఎదో ఒక కొత్తద‌నంతో ఓ వర్గం ఆడియెన్స్ ని ఆక‌ర్షిస్తున్న‌ శ్రీ విష్ణు ప్ర‌స్తుతం `తిప్పరా మీసం` అనే విభిన్న‌మైన‌ సినిమాతో అభిమానుల ముందుకు వ‌స్తున్నాడు. ఇదో పూర్తి మాస్ యాక్షన్ సినిమా. షూటింగ్ ప్రస్తుతం చివరి దశలో ఉంది.

గతంలో శ్రీ విష్ణు నటించిన నీది నాది ఒకే కథ - మెంటల్ మదిలో- బ్రోచేవారెవ‌రురా వీట‌న్నిటి కంటే భిన్న‌మైన చిత్ర‌మిది. ఇటీవల రిలీజ్ చేసిన‌ పోస్టర్ తోనే ఆ సంగ‌తి అర్థ‌మైంది. శ్రీ విష్ణు లుక్ చాలా డిఫరెంట్ గా ఉంది. తాజాగా తిప్ప‌రా మీసం టీజ‌ర్ ని రిలీజ్ చేశారు. ఈ టీజ‌ర్ లో సినిమా క‌థేంటో రివీల్ చేశారు. మందు.. సిగ‌రెట్.. అమ్మాయిలానే శ‌త్రువును వ్య‌స‌నంలా ఫీల‌య్యే కుర్రాడి క‌థ ఇది. దీనిని బ‌ట్టి ఇది అదిరిపోయే రివెంజ్ డ్రామా అని అర్థ‌మ‌వుతోంది. టీజ‌ర్ ఆద్యంతం శ‌త్రువుపై ప‌గ ప్ర‌తీకారం తీర్చుకుంటున్న‌ శ్రీ‌విష్ణు ఓ ప్రామిస్సింగ్ రోల్ లో న‌టిస్తున్నాడ‌ని రివీలైంది.

మందు సిగరెట్.. అమ్మాయిలా శ‌త్రువు కూడా వ్య‌స‌న‌మే .. ఆ వ్య‌స‌నానికి నేను కూడా బానిస‌నే! అంటూ వేట మొద‌లు పెట్టిన విధానం.. టీజర్ లో ర‌క్తి క‌ట్టించింది. క్రైమ్ డ్రామా .. రేసీ స్క్రీన్ ప్లే ఆక‌ట్టుకుంటాయ‌ని మేక‌ర్‌ చెబుతున్నారు. ఈ సినిమాకి సినిమాటోగ్రఫీ- బ్యాక్‌ గ్రౌండ్ స్కోర్ ప్ల‌స్ కానున్నాయ‌ని టీజ‌ర్ చూస్తేనే అర్థ‌మ‌వుతోంది. అసుర ఫేమ్ కృష్ణ విజయ్ ఈ చిత్రానికి దర్శకత్వం వహిస్తున్నారు. ఏదైనా కొత్త‌గా ట్రై చేయ‌క‌పోతే.. గుంపులో గోవిందంలా మిగిలిపోవాల‌న్న సంగ‌తిని శ్రీ‌విష్ణు గ్ర‌హించిన‌ట్టే అర్థ‌మ‌వుతోంది. అత‌డి సినిమా బాక్సాఫీస్ వ‌ద్ద ఏ రేంజులో మీసం తిప్ప‌నుందో వేచి చూడాలి. శ్రీ ఓం సినిమా- రిజ్వాన్ ఎంట‌ర్ టైన్ మెంట్స్- గ్లోబ‌ల్ సినిమా సంయుక్తంగా ఈ చిత్రాన్ని నిర్మిస్తున్నాయి.