చరణ్ సినిమాలో స్పెషల్ ఆర్టిస్ట్

బాలీవుడ్ నటీనటులు తెలుగు సినిమాల్లో తళుక్కుమనడం కొత్తేమీ కాదు. హీరోయిన్లు, విలన్లను అక్కడి నుంచి పట్టుకురావడం మామూలే. ఐతే ఈ మధ్య క్యారెక్టర్ ఆర్టిస్టుల్ని కూడా ముంబయి నుంచి పిలిపిస్తున్నారు. బొమన్ ఇరానీ ‘అత్తారింటికి దారేది’ సినిమాతో టాలీవుడ్ లో అడుగుపెట్టాడు. ఇప్పడు ‘బెంగాల్ టైగర్’లోనూ నటిస్తున్నాడు. ఈ కోవలోనే ఓ బాలీవుడ్ క్యారెక్టర్ ఆర్టిస్ట్ టాలీవుడ్ కు వస్తోంది. అమీర్ ఖాన్ తీసిన ‘తారే జమీన్ పర్’లో పిల్లాడి తల్లిగా అద్భుతంగా నటించిన ఆర్టిస్టు గుర్తుండే ఉంటుంది. ఆమె పేరు టిస్కా చోప్రా.

బాలీవుడ్లో ఇంకా చాలా సినిమాలే చేసింది టిస్కా చోప్రా. ఈ టాలెంటెడ్ యాక్ట్రెస్ రామ్ చరణ్ ‘బ్రూస్ లీ’ సినిమాతో టాలీవుడ్లో అడుగుపెడుతోంది. బాలీవుడ్ సినిమాల్ని బాగా ఫాలో అయ్యే దర్శకుడు శ్రీను వైట్ల టిస్కా కోసం ఓ మంచి పాత్ర తీర్చిదిద్ది.. ఆ క్యారెక్టర్ కు ఆమెను ఒప్పించాడు. ఈ క్యారెక్టర్ సినిమాలో చాలా స్పెషల్ అని అంటున్నారు. ‘బ్రూస్ లీ’లో నదియా కూడా ఓ ముఖ్య పాత్ర పోషిస్తుండటం విశేషం. ఆమె పాత్రకు దీటుగా టిస్కా క్యారెక్టర్ ఉంటుందట. అది క్లిక్ అయితే టిస్కాకు తెలుగులో మరిన్ని మంచి అవకాశాలు దక్కే అవకాశముంది. మరో వారం రోజుల్లో ఆడియో ఫంక్షన్ జరుపుకోనున్న ‘బ్రూస్ లీ’ సినిమా వచ్చే నెల 16న ప్రేక్షకుల ముందుకు రానుంది. ఫ్యామిలీ, యాక్షన్ ఎంటర్ టైనర్ గా ఈ సినిమాను తీర్చిదిద్దుతున్నాడు శ్రీను వైట్ల.