ద‌స‌రా స‌మ‌రానికి సై అంటున్న స్టార్లు

పండగ వ‌చ్చేస్తోందంటే చాలు.. టాలీవుడ్ లో ముందుగానే హ‌డావుడి వాతావ‌ర‌ణం క‌నిపిస్తుంది. కార‌ణం తెలుగు సినిమాల‌కు పండ‌గ సీజ‌నే కీల‌కం కాబ‌ట్టి. ద‌స‌రా.. దీపావ‌ళి.. సంక్రాంతి..ఈ సీజ‌న్ ల‌లో త‌మ సినిమాల‌ని రిలీజ్ చేయాల‌ని హీరోలు.. ద‌ర్శ‌కులు.. నిర్మాత‌లు ప్ర‌త్యేకంగా ఆలోచిస్తుంటారు. ప్ర‌త్యేకంగా త‌మ సినిమాల‌కు పోటీ లేకుండా చూసుకుంటుంటారు.

ఈ సారి కూడా మ‌న హీరోలు త‌మ‌త‌మ సినిమాల‌తో ఫెస్టివెల్ స‌మ‌రానికి రెడీ అయిపోతున్నారు. ఇప్ప‌టికే సంక్రాంతి ఫైట్ కి గ‌ట్టి పోటీనివ్వ‌డానికి స్టార్ హీరోలంతా సిద్ధ‌మ‌య్యారు. సంక్రాంతి స‌మ‌రం ఫిక్స్ అయిపోయింది. దీంతో అంద‌రి దృష్టి ద‌స‌రా ఫైట్ పై ప‌డింది. తాజాగా నాగ‌చైత‌న్య‌, సాయి ప‌ల్ల‌వి క‌లిసి న‌టించిన `ల‌వ్ స్టోరీ` సూప‌ర్ హిట్ కావ‌డం మిగ‌తా సినిమాల‌కు మ‌రింత బూస్ట్ నిచ్చింది. ఓవ‌రాల్ గా 20కోట్ల షేర్ తో యుఎస్ లో ఈ మూవీ ఇప్ప‌టికే 1 మిలియ‌న్ డాల‌ర్ మార్కుని దాటి స‌రికొత్త రికార్డుని నెల‌కొల్పింది.

ఇదిలా వుంటే ఈ మూవీ ఇచ్చిన ఉత్సాహంతో ద‌స‌రా సంద‌డి చాలా చిత్రాలు క్యూ క‌ట్టేస్తున్నాయి. అక్టోబ‌ర్ 15న ద‌స‌రా ఫెస్టివెల్ కావ‌డంతో చాలా వ‌ర‌కు చిత్రాలు బాక్సాఫీస్ దాడికి రెడీ అవుతున్నాయి. ద‌స‌రా ఫెస్టివెల్ ఫైట్ రెండు వారాల ముందుగానే ప్రారంభం కాబోతోంది. అక్టోబ‌ర్ 1న సాయిధ‌ర‌మ్‌తేజ్ న‌టించిన `రిప‌బ్లిక్` రిలీజ్ అవుతోంది. స‌మ‌కాలీన రాజ‌కీయాల్ని ప్ర‌క్షాళ‌న చేసే ఓ క‌లెక్ట‌ర్ క‌థ‌గా ఈమూవీని స‌రికొత్త కోణంలో దేవా క‌ట్టా ఆవిష్క‌రించారు.

ఆ త‌రువాత అదే నెల 8న వైష్ణ‌వ్ తేజ్‌.. క్రిష్‌ల `కొండ పొలం` విడుదల కాబోతోంది. ఆ వెంట‌నే వారం గ్యాప్‌తో శ‌ర్వానంద్‌, సిద్ధార్ధ్‌ల `మ‌హా స‌ముద్రం` అక్టోబ‌ర్ 15న రాబోతోంది. దీనికి ఒక్క రోజు ముందు అంటే అక్టోబ‌ర్ 14న అఖిల్ అక్కినేని .. పూజా హెగ్డేల `మోస్ట్ ఎలిజిబుల్ బ్యాచిల‌ర్` రాబోతోంది. ఇదే బాట‌లో నాగ‌శౌర్య అక్టోబ‌ర్ 15న రానుండ‌గా.. రౌడీ బాయ్స్‌.. పెళ్లి సంద‌డి కూడా విడుద‌ల‌కు సిద్ధ‌మ‌వుతున్నాయి. అయితే వీటికి ఏ డేట్ ని డిసైడ్ చేస్తార‌న్న‌ది ఇంకా ఖ‌రారు కాలేదు.