‘రెడ్డి’ కోసం ఒక్కొక్కరుగా కదులుతున్నారే..

వారం రోజులుగా తెలుగు ప్రేక్షకుల్లో తీవ్ర చర్చనీయాంశమవుతున్న సినిమా ‘అర్జున్ రెడ్డి’. గత గురువారం రాత్రి ప్రివ్యూ షోలు పడ్డప్పటి నుంచి ఇప్పటికి కూడా హైదరాబాద్ ట్విట్టర్ ట్రెండింగ్స్‌లో ‘అర్జున్ రెడ్డి’ అనే పదమే టాప్‌ లో ఉందంటే.. ఈ సినిమా ఇంపాక్ట్ ఎలాంటిదన్నది అర్థం చేసుకోవచ్చు. అడల్ట్ కంటెంట్.. బూతులు ఎక్కువ కావడం వల్ల కొన్ని విమర్శలు వ్యక్తమై ఉండొచ్చు. ఇలాంటి సినిమాలు పిల్లలు - యువతపై కొంత నెగెటివ్ ఎఫెక్ట్ చూపించవచ్చన్న అభిప్రాయం కూడా వ్యక్తమవుతున్న మాట కూడా వాస్తవమే. ఐతే కంటెంట్ - టేకింగ్ - యాక్టింగ్.. ఇలా చాలా విషయాల్లో తెలుగు సినిమాకు ‘అర్జున్ రెడ్డి’ ఎన్నో పాఠాలు నేర్పిందన్న మాట వాస్తవమే. మార్పు దిశగా ఈ సినిమా ఓ పెద్ద ముందడుగన్నదీ అంగీకరించాల్సిన విషయమే.

ఐతే తెలుగు సినిమాను ముందుకు తీసుకెళ్లే ఇలాంటి సినిమా వచ్చినపుడు.. ఇండస్ట్రీ నుంచి ఆశించిన రెస్పాన్స్.. ఎంకరేజ్మెంట్ అయితే కనిపించలేదు. టాలీవుడ్ సెలబ్రెటీలు ఈ సినిమా గురించి మొదట్లో మాట్లాడటానికి ఇష్టపడలేదు. ఈ సినిమాకు వచ్చిన హైప్.. టాక్ ప్రకారం సెలబ్రెటీలు చాలా త్వరగా సినిమా చూసేసి ఉండాలి. ఈ సినిమా గురించి స్పందించి ఉండాలి. కానీ అలా జరగలేదు. వీకెండ్ అయ్యేలోపు ఈ సినిమా గురించి స్పందించిన వాళ్లు చాలా తక్కువ. ఐతే ఇండస్ట్రీ మీద ‘అర్జున్ రెడ్డి’ ఎఫెక్ట్ ఎలాంటిదో.. ప్రేక్షకుల్లోకి ఈ సినిమా ఎంతగా వెళ్లిపోయిందో అర్థం చేసుకున్నాక టాలీవుడ్ బిగ్ సెలబ్రెటీల్లో ఒక్కొక్కరుగా ఈ సినిమా గురించి స్పందిస్తున్నారు. మంచు లక్ష్మి.. సమంత.. రానా దగ్గుబాటి.. క్రిష్.. రాజమౌళి.. నాగార్జున.. ఇలా ఒక్కొక్కరుగా ‘అర్జున్ రెడ్డి’ గురించి స్పందించారు. ఈ సినిమా ప్రత్యేకతను గుర్తించారు. దానిపై ప్రశంసలు కురిపించారు. ‘అర్జున్ రెడ్డి’ సక్సెస్ తమకు రుచించినా రుచించకపోయినా.. ఇది విస్మరించడానికి వీల్లేని సినిమా అనడంలో సందేహం లేదు. కాబట్టి మున్ముందు మరిందరు సెలబ్రెటీలు ఈ సినిమా గురించి స్పందిస్తారేమో చూద్దాం.