టాలీవుడ్ కు ఇండిపెండెన్స్ డే అంత స్పెషలా?

టాలీవుడ్ కు ఇండిపెండెన్స్ డే ఇంత స్పెషల్ గా ఇంకెప్పుడూ లేదేమో. నిన్నట్నుంచి లుక్కుల మీద లుక్కలు.. టీజర్ల మీద టీజర్లు.. ట్రైలర్లే ట్రైలర్లు.. ఎక్కడ చూసినా సందడే సందడి. అన్నింట్లోకి అత్యంత ఆసక్తి రేపింది పవన్ కళ్యాణ్ ‘సర్దార్ గబ్బర్ సింగ్’ ఫస్ట్ లుక్ పోస్టరే సరిగ్గా అర్ధరాత్రి 12 గంటలకు పవన్ ఫస్ట్ లుక్ రిలీజ్ చేసి సందడి చేసింది సర్దార్ యూనిట్. అర్ధరాత్రి లుక్ రిలీజ్ చేసినా పవన్ అభిమానుల సందడి మామూలుగా లేదు. కాసేపటికి ట్విట్టర్ లో టాప్ ట్రెండింగ్ అయిపోయింది ‘సర్దార్ గబ్బర్ సింగ్’ ఫస్ట్ లుక్. ఇక నిన్న రాత్రే కిక్-2 కొత్త ట్రైలర్ రిలీజ్ చేశారు. అందులో రవితేజ ఓ రేంజిలో రచ్చ చేశాడు. అభిమానులు ఎప్పుడెప్పుడా అని సినిమా కోసం ఎదురు చూసేలా ఉంది ఈ ట్రైలర్. మరోవైపు వరుణ్ తేజ్-క్రిష్ ల సినిమా ‘కంచె’ టీజర్ ఈ రోజు విడుదలై ఆసక్తికరంగా అనిపించింది. భలే భలే మగాడివోయ్ ట్రైలర్ కూడా స్వాతంత్ర్య దినోత్సవం సందర్భంగా సందడి చేస్తోంది.

ఇక ఫస్ట్ లుక్ లైతే లెక్కేలేవు. ఎన్టీఆర్-సుకుమార్ కాంబినేషన్లో తెరకెక్కుతున్న సినిమా లుక్ మొదలుకుని.. సునీల్-దిల్ రాజు-వాసు వర్మల కాంబినేషన్లో వస్తున్న ‘కృష్ణాష్టమి’, అంజలి ప్రధాన పాత్రలో తెరకెక్కుతన్న ‘చిత్రాంగద’, రమేష్ వర్మ రూపొందిస్తున్న ‘అమ్మాయితో అబ్బాయి’, అనుష్క, ఆర్యల ‘సైజ్ జీరో’, రామ్ హీరోగా రూపొందుతున్న ‘శివమ్’.. ఇవి కాక చిత్రం భళారే విచిత్రం అనే సినిమా ఫస్ట్ లుక్ పోస్టర్ ఈ రెండు రోజుల్లోనే రిలీజయ్యాయి. మొత్తంగా దాదాపు పది సినిమాలకు పైగా ఫస్ట్ లుక్, టీజర్లు రిలీజవడంతో టాలీవుడ్ లో సందడి నెలకొంది. మామూలుగా అయితే సంక్రాంతి, దసరా లాంటి సీజన్లలో ఇలాంటి సందడి కనిపిస్తుంది కానీ.. ఈసారి చిత్రంగా ఇండిపెండెన్స్ డే రోజు హంగామా నెలకొనడం విశేషం.