ఆగ‌స్టును వేడెక్కిస్తున్న బిగ్‌ స్టార్స్‌

అవును.. ఆగ‌స్టు వేడెక్కుతోంది. స‌మ్మ‌ర్ వెళ్లి చినుకులు ప‌డినా ఇంకా ఇంకా హీట్‌ తో కాక‌లు పుట్టించ‌బోతోంది. అస‌లింత‌కీ వ‌ర్షాకాలంలో ఇదెట్టా.. అంటారా?.. అందుకు ఓ కార‌ణం ఉంది. ఈ సీజ‌న్‌లో మెగా గిగా స్టార్ల టీజ‌ర్లు - ఫ‌స్ట్‌ లుక్‌ లు ఒక‌టేమిటి... దెబ్బ‌కు ఆగ‌స్ట్ మంథ్ అగ్గి రాజుకుపోవ‌డం గ్యారెంటీ!

ఆగ‌స్టు 9న మ‌హేష్ - వంశీ పైడిప‌ల్లి ఫ‌స్ట్‌ లుక్ .. ఆగ‌స్టు 15న ఎన్టీఆర్ - త్రివిక్ర‌మ్ తొలి టీజ‌ర్ .. ఆగ‌స్టు 15న ర‌జ‌నీకాంత్ - శంక‌ర్‌ల 2.ఓ టీజ‌ర్ ... ఆగ‌స్టు 22న మెగాస్టార్ చిరంజీవి బ‌ర్త్‌ డేకి సైరా టీజ‌ర్ .. ఈ రేంజులో ధ‌మాకా మోగ‌బోతుంటే అభిమానుల గుండెల్లో అగ్గి రాజుకుపోకుండా ఉంటుందా? ఇప్ప‌టికే ఆగ‌స్టులో 9 - 15 - 15 - 22 తేదీలు లాక్ అయిపోవ‌డంతో ఆ తేదీలు ఎప్పుడొస్తాయా? అన్న ఉత్కంఠ అభిమానుల్ని నిలువ‌నీయ‌డం లేదు. ఇక ఆగ‌స్టు 10లోపే క‌మ‌ల్ హాస‌న్ న‌టిస్తున్న `విశ్వ‌రూపం 2` రిలీజ్‌ కి వ‌స్తోంది కాబ‌ట్టి ఈ సినిమాకి సంబంధించి వ‌రుస టీజ‌ర్లు - ట్రైల‌ర్ల‌తో విశ్వ‌న‌టుడు సైతం అంతే హీట్ పెంచ‌నున్నాడుట‌. ఇక చిన్నా చిత‌కా హీరోల టీజ‌ర్లు - ట్రైల‌ర్లు ఎలానూ రిలీజ్‌ కి వ‌స్తూనే ఉంటాయి. 2.ఓ టీజ‌ర్ - సైరా టీజ‌ర్ గురించి ర‌జ‌నీకాంత్‌ - చిరంజీవి అభిమానులే కాదు ప్ర‌పంచం మొత్తం ఎంతో ఉత్కంఠ‌గా ఎదురు చూస్తోంది. 2.ఓ 400 కోట్ల బ‌డ్జెట్‌ తో తెర‌కెక్కుతున్న సినిమా. సైరా దాదాపు 300కోట్ల బ‌డ్జెట్‌ తో తెర‌కెక్కిస్తున్న సినిమా కాబ‌ట్టి ఆ మేర‌కు అంచ‌నాలు అంతే భారీగానూ ఉన్నాయి.