అడ్వాన్స్ బుకింగ్స్ అదిరిపోతున్నాయ్

సినిమా తీయడం కంటే కూడా ఈ రోజుల్లో సరైన తేదీకి విడుదల చేసుకోవడం కీలకమైన విషయం. ఇందులో చిన్నా పెద్ద తేడాలు కూడా లేవు. పెద్ద పెద్ద సినిమాలకు కూడా రిలీజ్ డేట్ల విషయంలో ఇబ్బందులు తప్పట్లేదు. సినిమాల సంఖ్య బాగా పెరిగిపోవడంతో పోటీ ఎక్కువైపోయి.. మంచి టైమింగ్ చూసి సినిమాను విడుదల చేయడం ఇబ్బందిగా మారిపోతోంది. ఇంతకుముందు లాగా సినిమా పూర్తి చేసి తీరిగ్గా రిలీజ్ డేట్ వెతుక్కునే పరిస్థితి లేదిప్పుడు. చాలా ముందే స్లాట్ బుక్ చేసుకోవాల్సిందే. ఆ సమయానికి విడుదల కుదిరితే రిలీజ్ చేయడం.. లేదంటే వాయిదా వేసుకోవడం.. అందుకే ప్రేక్షకులు సినిమాలకు అడ్వాన్స్ బుకింగ్ చేసుకున్నట్లు.. రిలీజ్ డేట్ విషయంలోనూ జాగ్రత్త పడుతున్నారు దర్శక నిర్మాతలు.

ప్రస్తుతం టాలీవుడ్ లో వచ్చే మూడు నెలలకు స్లాట్లు బుక్ అయిపోయాయి. నవంబరు తొలి వారంలో త్రిపుర - శంకరాభరణం రిలీజవుతుండగా.. తర్వాతి వీకెండ్ కోసం అఖిల్ - చీకటి రాజ్యం తయారవుతున్నాయి. మూడో వారం సంగతి తేలలేదు కానీ.. నాలుగో వారానికి బెంగాల్ టైగర్ - సైజ్ జీరో షెడ్యూల్ అయ్యాయి. డిసెంబర్ లో కూడా క్రౌడ్ బాగానే ఉంది. 4న నాగచైతన్య సినిమా ‘సాహసం శ్వాసగా సాగిపో’ విడుదలవుతుంటే.. 18న పూరి-వరుణ్ తేజ్ ల ‘లోఫర్’ డేట్ ఫిక్స్ చేసుకుంది. 24న నాగార్జున సినిమా ‘సోగ్గాడే చిన్నినాయనా’.. మరుసటి రోజు సౌఖ్యం - మామ మంచు అల్లుడు కంచు సినిమాలు షెడ్యూల్ అయి ఉన్నాయి. ఇక సంక్రాంతి సినిమాల సంగతి తెలిసిందే. ప్రస్తుతానికి నాన్నకు ప్రేమతో - డిక్టేటర్ - సర్దార్ రేసులో ఉన్నాయి. మరి ఈ సినిమాలన్నింట్లో ఏవి పక్కానో, ఏవి వాయిదా పడతాయో చెప్పలేం కానీ.. వచ్చే మూడు నెలల్లో పేరున్న సినిమాలు ఓ 20 దాకా విడుదలయ్యే అవకాశముంది.