జూలైలో సంద‌డికి రెడీ అయిన‌వి ఇవే

క‌రోనా కారణంగా విడుద‌ల వాయిదాప‌డిన సినిమాల‌న్నీ ఇటీవ‌ల బ్యాక్ టు బ్యాక్ థియేట‌ర్ల‌లో సంద‌డి చేస్తున్న విష‌యం తెలిసిందే. స్మాల్ మూవీస్ నుంచి పాన్ ఇండియా మూవీస్ వ‌ర‌కు గ‌త కొన్ని నెల‌లుగా థియేట‌ర్ల‌లో సంద‌డి చేస్తూనే వున్నాయి. అయితే ఈ నెల 17 త‌రువాత బిగ్ అండ్ మీడియం రేంజ్ సినిమాల సంద‌డి రెండు వారాల పాటు అంటే జూలై వ‌ర‌కు క‌నిపించ‌దు. కార‌ణం జూన్ 17న రానా, సాయి ప‌ల్ల‌వి జంట‌గా న‌టించిన `విరాట‌ప‌ర్వం` విడుద‌ల‌వుతోంది. ఈ మూవీ త‌రువాత రెండు వారాల పాటు మ‌రో సినిమా థియేట‌ర్ల‌కు రావ‌డం లేదు.

జూలై 1 నుంచి మ‌ళ్లీ మీడియం రేంజి సినిమాల హ‌డావిడీ బాక్సాఫీస్ వ‌ద్ద మొద‌లు కాబోతోంది. ఇందులో ముందుగా హీరో గోపీచంద్ న‌టించిన `ప‌క్కా క‌మ‌ర్షియ‌ల్` మూవీ థియేట‌ర్లలోకి రాబోతోంది. మారుతి డైరెక్ష‌న్ లో మారుతి మార్కు ఎంట‌ర్ టైన్ మెంట్‌, హీరో గోపీచంద్ మార్కు యాక్ష‌న్ అంశాల నేప‌థ్యంలో ఈ మూవీని తెర‌కెక్కించారు. గీతా ఆర్ట్స్ 2, యువీ క్రియేష‌న్స్ బ్యాన‌ర్స్ పై బ‌న్నీవాసు ఈ మూవీని నిర్మించారు. రాశిఖ‌న్నా హీరోయిన్ గా న‌టించిన ఈ మూవీ హీరో గోపీచంద్ కు, ద‌ర్శ‌కుడు మారుతికి ఖ‌చ్చితంగా హిట్ కావాల్సిందే. ఇటీవ‌ల విడుద‌ల చేసిన ట్రైల‌ర్ సినిమాపై అంచ‌నాల్ని పెంచేసింది.

ఈ మూవీ త‌రువాత వారం గ్యాప్ లో వ‌స్తున్న చిత్రం `థాంక్యూ`. అక్కినేని నాగ‌చైత‌న్య హీరోగా న‌టించిన మూవీ ఇది. `మ‌నం` ఫేమ్ విక్ర‌మ్ కె. కుమార్ డైరెక్ట్ చేశారు. రాశిఖ‌న్నా, మాళ‌విక నాయ‌ర్‌, అవికా గోర్‌ హీరోయిన్ లు. దిల్ రాజు, శిరీష్ నిర్మించిన ఈ మూవీ జూలై 8న థియేట‌ర్ల‌లోకి రాబోతోంది. హాకీ ప్లేయ‌ర్ గా, సూప‌ర్ స్టార్ మ‌హేష్ బాబు హార్డ్ కోర్ ఫ్యాన్ గా నాగ‌చైత‌న్య ఈ మూవీలో భిన్న‌మైన పాత్ర‌లో క‌నిపించ‌బోతున్నారు. నానితో చేసిన `గ్యాంగ్ లీడ‌ర్` ఆశించిన ఫ‌లితాన్ని అందించ‌క‌పోవ‌డంతో ఈ మూవీపై విక్ర‌మ్ కుమార్ భారీ అంచ‌నాలు పెట్టుకున్నాడు.

నాగ‌చైత‌న్య‌కు కూడా ఈ మూవీ హిట్ చాలా అవ‌స‌రం. ఇక చై త‌ర‌వాత లైన్ లోకి దిగుతున్న హీరో ఉస్తాద్ రామ్‌. ఆయ‌న న‌టిస్తున్న భారీ యాక్ష‌న్ ఎంట‌ర్ టైన‌ర్ `ది వారియ‌ర్‌`. శ్రీ‌నివాస చిట్టూరి నిర్మిస్తున్న ఈ మూవీని త‌మిళ ద‌ర్శ‌కుడు ఎన్‌. లింగుసామి రూపొందిస్తున్నారు. కృతిశెట్టి, అక్ష‌రా గౌడ హీరోయిన్ లుగా న‌టిస్తున్నారు. ఆది పినిశెట్టి ప‌వ‌ర్ ఫుల్ విల‌న్ గా క‌నిపించ‌బోతున్నాడు. ఈ మూవీపై హీరో రామ్‌, ద‌ర్శ‌కుడు ఎన్‌. లింగుసామి భారీ అంచ‌నాలు పెట్టుకున్నారు.

ఈ మూవీ త‌రువాత నిఖిల్ న‌టించిన `కార్తికేయ 2` రాబోతోంది. `కార్తికేయ‌` సంచ‌ల‌న విజ‌యాన్ని సాధించిన నేప‌థ్యంలో దానికి సీక్వెల్ గా వ‌స్తున్న `కార్తికేయ 2` పై భారీ అంచ‌నాలే వున్నాయి. చందూ మొండేటి డైరెక్ట్ చేస్తున్న ఈ మూవీని అభిషేక్ అగ‌ర్వాల్ ఆర్ట్స్‌, పీపుల్ మీడియా ఫ్యాక్ట‌రీ సంయుక్తంగా నిర్మిస్తోంది. అనుప‌మ ప‌ర‌మేశ్వ‌ర‌న్ హీరోయిన్ గా నటిస్తున్న ఈ మూవీ ద్వారా బాలీవుడ్ ఫేమ‌స్ న‌టుడు అనుప‌మ్ ఖేర్ ప‌రిచ‌య‌మ‌వుతున్నారు. ఈ మూవీని జూలై 22న విడుద‌ల చేస్తున్నారు. అయితే ఇది నిఖిల్ కెరీర్ లోనే తొలి సారి ఐదు భాష‌ల్లో పాన్ ఇండియా వైడ్ గా విడుద‌ల కాబోతోంది.