ద‌స‌రా స‌మ‌రం..స‌మ‌స్య‌ మ‌ళ్లీ మొద‌టికొచ్చిందా?

ఈ ద‌స‌రా పండ‌గ సీజ‌న్ బ‌రిలో సీనియ‌ర్ హీరోలు చిరంజీవి, నాగార్జున న‌టించిన పెద్ద సినిమాలు పోటీప‌డుతున్న విష‌యం తెలిసిందే. మ‌ధ్య‌లో ఓ చిన్న హీరో సినిమా కూడా బ‌రిలోకి దిగుతోంది. దీంతో ఈ సారి ప్రేక్ష‌కుల‌కు రెండు భారీ యాక్ష‌న్ సినిమాల‌తో పాటు ఓ రొమాంటిక్ ఎంట‌ర్ కావాల్సిన వినోదాన్ని అందించ‌బోతోంది అంటూ ఇండ‌స్ట్రీ వ‌ర్గాలు, ట్రేడ్ పండితులు భావించారు. అయితే ఇదే స‌మ‌యంలో మ‌ణిర‌త్నం `పొన్నియిన్ సెల్వ‌న్ 1` రావ‌డంతో తెలుగు సినిమాల‌కు థియేట‌ర్లు ఎలా అని టెన్ష‌న్ ప‌డ్డారు.

ఈ మూవీని తెలుగులో స్టార్ ప్రొడ్యూస‌ర్ క‌మ్ నైజామ్ డిస్ట్రిబ్యూట‌ర్ దిల్ రాజు భారీ స్థాయిలో రిలీజ్ చేశాడు. సెప్టెంబ‌ర్ 30న భారీ అంచ‌నాల మ‌ధ్య విడుద‌లైన `పొన్నియిన్ సెల్వ‌న్ 1` ఏ విష‌యంలోనూ అనుకున్న విధంగా టాక్ ని రాబ‌ట్ట‌లేక‌పోయింది. దీంతో మ‌న వాళ్లు ఊప‌రి పీల్చుకున్నారు. సినిమా యావ‌రేజ్ గా నిల‌వ‌డం, పెద్ద‌గా ఎవ‌రికీ ఎక్క‌క‌పోవ‌డంతో దీని వ‌ల్ల మ‌న తెలుగు సినిమాల‌కు ఎలాంటి ఇబ్బంది లేద‌ని, థియేట‌ర్స్ స‌మ‌స్య అస‌లే వుండ‌ద‌ని అంతా భావించారు.

అయితే స‌మ‌స్య‌ మ‌ళ్లీ మొద‌టికొచ్చింద‌ని తెలుస్తోంది. `పొన్నియిన్ సెల్వ‌న్ 1` కార‌ణంగా కొన్ని థియేట‌ర్లు ఇప్ప‌టికే బ్లాక్ అయ్యాయి. ఇక ద‌స‌రాకు బ‌రిలోకి దిగుతున్న రెండు భారీ సినిమాల‌కు ఇప్ప‌డు థియేట‌ర్ల స‌మ‌స్య వ‌చ్చిప‌డిందని తెలుస్తోంది. మెగాస్టాన్ న‌టించిన యాక్ష‌న్ ఎంట‌ర్ టైన‌ర్ `గాడ్ ఫాద‌ర్‌`. మోహ‌న్ రాజా డైరెక్ట్ చేసిన ఈ మూవీపై మంచి బ‌జ్ వుంది. అయితే ఇదే స‌మ‌యంలో కింగ్ నాగార్జున న‌టించిన `ది ఘోస్ట్‌` కూడా పోటీకి దిగుతోంది.

మ‌ధ్య‌లో చిన్న సినిమా `స్వాతిముత్యం` కూడా వ‌చ్చేస్తోంది. ఈ మూడు సినిమాల్లో ప్ర‌ధాన థియేట‌ర్ల విష‌యంలో మెగాస్టార్ `గాడ్ ఫాద‌ర్‌` కు అన్యాయం జ‌రుగుతోంద‌నే ఆరోప‌ణ‌లు వినిపిస్తున్నాయి. ఏషియ‌న్ ఫిలింస్ కి చెందిన సినిమా `ది ఘోస్ట్‌` వారి చేతుల్లో చాలా థియేట‌ర్లు వున్నాయి. వాటిల్లో త‌మ సినిమానే వేసుకుంటున్నార‌ట‌. `గాడ్ ఫాద‌ర్‌` కు థియేట‌ర్లు ఇవ్వ‌డం లేద‌ట‌. ఇక దిల్ రాజుకు `గాడ్ ఫాద‌ర్‌` నైజాం హ‌క్కులు ఇవ్వ‌క‌పోవ‌డంతో తాను `పొన్నియిన్ సెల్వ‌న్ 1`తో పాటు కొన్ని ప్ర‌ధాన థియేట‌ర్ల‌ని `స్వాతిముత్యం`కు కేటాయిస్తున్నార‌ట‌.

దీంతో `గాడ్ ఫాద‌ర్‌` కు మెయిన్ థియేట‌ర్ల స‌మ‌స్య ఎదుర‌వుతోంద‌ని ఫ్యాన్స్ మండిప‌డుతున్నారు. రిలీజ్ మ‌రో రెండు రోజులే వున్న నేప‌థ్యంలో `గాడ్ ఫాద‌ర్‌` ఈ స‌మ‌స్య నుంచి ఎలా గ‌ట్టెక్కుతుంది? .. నాగ్ `ది ఘోస్ట్` మూవీతో స‌మానంగా థియేట‌ర్ల‌ని ద‌క్కించుకుంటుందా? ద‌స‌రా రేసులో పోటీప‌డుతున్న నాగ్ పై చేయి సాధిస్తాడా? లేక చిరు బ్లాక్ బ‌స్ట‌ర్ హిట్ తో చెల‌రేగిపోతాడా? .. లేక ఈ ఇద్ద‌రి మ‌ధ్య‌లో పోటీకి దిగుతున్న `స్వాతిముత్యం` స‌ర్ ప్రైజ్ చేస్తుందా? అన్న‌ది వేచి చూడాల్సిందే.