లీకు రాయుళ్లకు చెక్ పెడతారా..?

మెగా పవర్ స్టార్ రామ్ చరణ్ హీరోగా స్టార్ డైరెక్టర్ శంకర్ దర్శకత్వంలో ఓ భారీ సినిమా తెరకెక్కుతున్న సంగతి తెలిసిందే. దిల్ రాజు సమర్పణలో శ్రీ వెంకటేశ్వర క్రియేషన్స్ పతాకంపై శిరీష్ ఈ చిత్రాన్ని నిర్మిస్తున్నారు. ఇది చరణ్ కెరీర్ లో 15వ చిత్రం.. శంకర్ డైరెక్ట్ చేస్తున్న ఫస్ట్ స్ట్రెయిట్ తెలుగు సినిమా.. దిల్ రాజు బ్యానర్ లో మైలురాయి 50వ చిత్రం. అందుకే మేకర్స్ ప్రతిష్టాత్మకంగా తీసుకున్నారు. అయితే లీకుల బెడద నిర్మాతలకు తలనొప్పిగా మారుతోంది.

RC15 చిత్రాన్ని అధిక బడ్జెట్ తో పాన్ ఇండియా స్థాయిలో రూపొందిస్తున్నారు. ఈ సినిమా కొత్త షెడ్యూల్ సోమవారం రాజమండ్రిలో ప్రారంభమైంది. ఇందులో రామ్ చరణ్ మరియు అంజలి లపై కీలక సన్నివేశాలను చిత్రీకరిస్తున్నారు. అయితే వీరిద్దరికి సంబంధించిన కొన్ని చిత్రాలు ఇప్పుడు సోషల్ మీడియాలోలీక్ అయ్యాయి

వెంటేజ్ లుక్స్ లో కనిపిస్తున్న చరణ్ - అంజలి ఫోటోలు క్షణాల్లోనెట్టింట వైరల్ అయ్యాయి. ఈ లీక్స్‌ తో మేకర్స్ షాక్‌ కు గురయ్యారు. దీనిపై చిత్ర నిర్మాత దిల్ రాజు ఆగ్రహం వ్యక్తం చేశారని తెలుస్తోంది. అంతేకాదు ఈ విషయంపై దర్యాప్తు చేయాలని ఆయన బృందాన్ని కోరారని టాక్ వినిపిస్తోంది.

నిజానికి RC15 సెట్స్ పైకి వెళ్లినప్పటి నుంచే ఈ లీకుల పర్వం నడుస్తోంది. ఆ మధ్య రామ్ చరణ్ కు సంబంధించిన లుక్ బయటకు వచ్చింది. ఆ తర్వాత వైజాగ్ లో షూటింగ్ స్పాట్ నుంచి చెర్రీ మీద తీస్తున్న సీన్స్ లీక్ అయ్యాయి. దీంతో ఈ సినిమాలో చరణ్ ద్విపాత్రాభినయంలో కనిపించనున్న విషయం అందరికీ తెలిసిపోయింది. ఈ నేపథ్యంలో దీనిపై మేకర్స్ సీరియస్ అయ్యారు. కఠిన చర్యలు తీసుకుంటామని హెచ్చరిస్తూ ఓ నోట్ కూడా రిలీజ్ చేశారు. అయినప్పటికీ ఈ లీక్స్ కు బ్రేక్స్ పడలేదు.

రామ్ చరణ్ సినిమాలో అంజలి కీలక పాత్ర పోషిస్తుందని అందరికీ తెలుసు. కానీ ఇప్పుడు లీకైన ఫోటోల వల్ల వీరిద్దరూ జంటగా నటిస్తున్నారని క్లారిటీ వచ్చేసింది. దీని వల్ల ప్రేక్షకుల్లో ఎగ్జైట్మెంట్ పోయే అవకాశం ఉంటుంది. అందుకే RC15 మేకర్స్ దీన్ని సీరియస్ గా తీసుకోవాలని అభిమానులు కోరుతున్నారు. మరి దిల్ రాజు దీనిపై ఎలాంటి చర్యలు తీసుకుంటారో చూడాలి.

ప్రస్తుతం జరుగుతున్న ఈ సినిమా షెడ్యూల్ ఈ వారాంతం వరకు కొనసాగనుంది. ఈ షెడ్యూల్‌ లో కొన్ని కీలకమైన ఫ్లాష్‌ బ్యాక్ ఎపిసోడ్‌ లను చిత్రీకరించనున్నారు. ఈ షెడ్యూల్ తర్వాత శంకర్ మళ్లీ 'భారతీయుడు 2' షూట్‌ కి షిఫ్ట్ అవుతారు. మరోవైపు రామ్ చరణ్ RRR జపాన్ రిలీజ్ కోసం ఎన్టీఆర్ తో కలిసి ప్రమోషన్స్‌ లో పాల్గొనే అవకాశం ఉంది. కాబట్టి శంకర్ సినిమా నెక్స్ట్ షెడ్యూల్ కు కాస్త టైం పట్టొచ్చు.

RC15 అనేది పొలిటికల్ యాక్షన్ థ్రిలర్. ఇందులో రామ్ చరణ్ సరసన కియారా అద్వానీ - అంజలి హీరోయిన్లుగా నటిస్తున్నారు. ఎస్ జె సూర్య విలన్ గా నటిస్తుండగా.. సునీల్ - శ్రీకాంత్ - జయరామ్ - నవీన్ చంద్ర తదితరులు ఇతర కీలక పాత్రలు పోషిస్తున్నారు. ఎస్ఎస్ థమన్ సంగీతం సమకూరుస్తున్న ఈ చిత్రానికి తిరు సినిమాటోగ్రఫీ అందిస్తున్నారు. బుర్రా సాయి మాధవ్ డైలాగ్స్ రాస్తున్నారు.

నిజానికి RC15 చిత్రాన్ని 2023 సమ్మర్ కి రిలీజ్ చేయాలని ప్లాన్ చేసుకున్నారు. అయితే ఇప్పుడు ఈ సినిమాని మరికొన్ని నెలలు ముందుకు తీసుకెళ్లనున్నట్లు టాక్. దీని తర్వాత కన్నడ దర్శకుడు నార్తన్ తో చెర్రీ ఓ సినిమాకి కమిట్ అయినట్లు టాక్. యూవీ క్రియేషన్స్ బ్యానర్ లో రూపొందే ఈ ప్రాజెక్ట్‌ పై అధికారిక ప్రకటన రావాల్సి ఉంది.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.