రిలీజ్ డేట్లు క్లియరైపోయాయి..

నాలుగు రోజుల వ్యవధిలో రెండు భారీ సినిమాల రిలీజ్ విషయంలో ఓ క్లారిటీ వచ్చేసింది. ఓ పక్క ‘కబాలి’ రిలీజ్ డేట్ ఖరారైపోయింది. మరో పక్క ‘జనతా గ్యారేజ్’ ఆగస్టు 12 నుంచి వాయిదా పడి సెప్టెంబరు 2కు వెళ్లిపోయింది. దీంతో ఈ రెండు సినిమాల విడుదల తేదీల్ని బట్టి తమ సినిమాల్ని షెడ్యూల్ చేసుకుందామని వేచి చూస్తున్న వేరే సినిమాల నిర్మాతలకు ఓ క్లారిటీ వచ్చేసింది.

జులై 22న కబాలి రాకుంటే తమ సినిమాను విడుదల చేద్దామని చూసిన ‘జక్కన్న’ నిర్మాతలు.. కబాలి యధావిధిగా అదే రోజు వస్తుండటంతో తర్వాతి వారం.. అంటే జులై 29కి తమ సినిమాను ప్లాన్ చేసుకున్నారు. ఇక అదే రోజు మరో చిన్న సినిమా కూడా రిలీజవుతోంది. అదే.. పెళ్లి చూపులు. ట్రైలర్ తో ఆసక్తి రేకెత్తించిన ఈ సినిమాను సునీల్ సినిమాకు పోటీగా తెచ్చేస్తున్నారు.

మరోవైపు ‘బాబు బంగారం’ ఆగస్టు 12కు ఫిక్సవగా.. ఆ మరుసటి రోజు ‘తిక్క’ సినిమాను రిలీజ్ చేయాలని నిర్ణయించారు. ఆగస్టు 5 సంగతి తేలాల్సి ఉంది. ఆ రోజు ‘సాహసం శ్వాసగా సాగిపో’ను రిలీజ్ చేసే అవకాశాన్ని పరిశీలిస్తున్నారు. అది వచ్చినా రాకున్నా ‘చుట్టాలబ్బాయి’ని ఆ రోజు విడుదల చేయాలని కూడా ఆలోచిస్తున్నారు. చంద్రశేఖర్ యేలేటి సినిమా ‘మనమంతా’ను ఆగస్టు 19న రిలీజ్ చేసే అవకాశాలు కనిపిస్తున్నాయి. మరోవైపు అల్లు శిరీష్ సినిమా ‘శ్రీరస్తు శుభమస్తు’ను సెప్టెంబరు 16న విడుదల చేస్తున్నట్లుగా ప్రకటన వచ్చేసింది.