రిలీజ్ డేట్లపై కొంచెం క్లారిటీ వచ్చింది

పెద్ద నోట్ల రద్దు నిర్ణయంతో ఒక్కసారిగా సినీ పరిశ్రమలో కలకలం రేగింది. కొత్త సినిమాల రిలీజ్ డేట్లన్నీ తారుమారైపోయాయి. గత రెండు వారాల్లో రావాల్సిన చాలా సినిమాలు వెనక్కి వెళ్లిపోయాయి. ఏ సినిమా ఎప్పుడు వస్తుందో తెలియక గందరగోళంలో పడిపోయారు జనాలు. ఐతే ఇప్పుడు నెమ్మదిగా క్లారిటీ వస్తోంది. తర్వాతి రెండు మూడు వారాల్లో ఏ సినిమా ఎప్పుడొస్తుందో ఒక క్లారిటీ వచ్చేసింది. వాటిలో ఏ సినిమా ఏమాత్రం ఆకర్షిస్తోందో చూద్దాం పదండి.

ఈ శుక్రవారం శ్రీనివాసరెడ్డి సినిమా ‘జయమ్ము నిశ్చయమ్మురా’ మంచి అంచనాల మధ్య విడుదలవుతోంది. దీనికి పోటీగా రెండు తమిళ డబ్బింగ్ సినిమాలు రేసులో ఉన్నాయి. అందులో ఒకటి ‘రెమో’. దిల్ రాజు ఈ సినిమా పోస్టర్ మీదికి రావడం.. దీనికి తోడు పబ్లిసిటీ ఓ రేంజిలో చేస్తుండటంతో తెలుగు ప్రేక్షకుల్ని బాగానే ఆకర్షిస్తోందీ సినిమా. మరోవైపు జీవా మూవీ ‘రంగం-2’ను కూడా ఈ శుక్రవారమే రిలీజ్ చేస్తున్నారు కానీ.. జనాలకు ఆ సినిమా పట్టేలా లేదు.

ఇక తర్వాతి వారం విషయానికి వస్తే.. ఈ నెల 18 నుంచి వాయిదా పడ్డ ‘బేతాళుడు’ డిసెంబరు 1న వచ్చేస్తున్నాడు. విజయ్ ఆంటోనీకి గురువారం సినిమాల్ని రిలీజ్ చేసే సెంటిమెంటు ఉండటంతో ఈ చిత్రాన్ని కూడా ఆ రోజే రిలీజ్ చేస్తున్నాడు. తెలుగుతో పాటు తమిళంలోనూ ఆ రోజే ఆ చిత్రం రిలీజవుతుంది. మోహన్ లాల్ హీరోగా నటించిన మరో డబ్బింగ్ మూవీ ‘మన్యం పులి’ మరుసటి రోజు.. అంటే డిసెంబరు 2న ప్రేక్షకుల ముందుకొస్తుంది. ఆ రోజే అల్లరి నరేష్ సినిమా ‘ఇంట్లో దెయ్యం నాకేం భయం’ కూడా రిలీజ్ చేయాలనుకుంటున్నారు. తర్వాతి వీకెండ్ కు ‘ధృవ’ ఫిక్సయింది. ఆ తర్వాతి వారం రావాల్సిన ‘సింగం-3’ విషయంలో కొంచెం సస్పెన్స్ నడుస్తోంది.

Like Us on Facebook : https://www.facebook.com/Tupakidotcom/