వైరల్ పిక్: మెగాస్టార్ తో టాలీవుడ్ స్టార్ డైరెక్టర్స్..!

టాలీవుడ్ స్టార్ హీరోలు - అగ్ర దర్శకులందరూ ఒకచోట కలవడం చాలా అరుదుగా చూస్తూ ఉంటాం. సినిమా వేడుకల్లోనో సెలబ్రిటీలు నిర్వహించే శుభకార్యాలలోనే లేదా స్టార్ హీరోల బర్త్ డే వేడుకల్లోనో ఇలాంటి దృశ్యం కనిపిస్తుంది. సింగిల్ ఫ్రేమ్ లో టాలీవుడ్ టాప్ డైరెక్టర్స్ అందరూ కనిపిస్తే ఎలా ఉంటుంది?. ఇప్పుడు అలాంటి ఫోటో ఒకటి బయటకు వచ్చింది. తెలుగు చిత్ర పరిశ్రమలోని అగ్ర దర్శకులందరూ ఒకే ఫ్రేమ్ లో దర్శనమిచ్చారు. అది కూడా మెగాస్టార్ చిరంజీవి తో కలిసి.

'మహర్షి' దర్శకుడు వంశీ పైడిపల్లి జూలై 25న తన 42వ పుట్టినరోజు జరుపుకున్న విషయం తెలిసిందే. బర్త్ డే సెలబ్రేషన్స్ ని వంశీ ఇండస్ట్రీ మిత్రులతో సహచరులతో కలిసి ప్రత్యేకంగా జరుపుకున్నారు. ఈ వేడుకకు చిరంజీవితో పాటుగా దర్శకులు బి. గోపాల్ - కొరటాల శివ - పరశురామ్ పెట్లా - సుకుమార్ - బోయపాటి శ్రీను - మెహర్ రమేష్ హాజరయ్యారు. అంతేకాదు కీర్తి సురేష్ - సంగీత - కార్తీ - అల్లు అరవింద్ - సోనూసూద్ - దిల్ రాజు దంపతులతో పాటుగా పలువురు సినీ ప్రముఖులు పాల్గొని సందడి చేశారు.

ఈ నేపథ్యంలో మెగాస్టార్ చిరంజీవి తో కలిసి టాలీవుడ్ దర్శకులంతా కలిసి తీసుకున్న ఓ సెల్ఫీ పిక్ సోషల్ మీడియాలో వైరల్ అవుతోంది. మెహర్ రమేష్ క్లిక్ చేసిన సెల్ఫీ లో బోయపాటి శ్రీను - బి.గోపాల్ - చిరంజీవి - పరశురామ్ - కొరటాల శివ - సుకుమార్ వక్కంతం వంశీ - వంశీ పైడిపల్లి కనిపిస్తున్నారు. అయితే ఇందులో చిరు లుక్ చూసిన నెటిజన్స్.. ఈ పిక్ ఇప్పటిది కాదని కామెంట్స్ చేస్తున్నారు. ఇది ఎప్పటి ఫోటో అనేది పక్కన పెడితే.. టాలీవుడ్ స్టార్ దర్శకులందరూ మెగాస్టార్ తో కలిసి ఇలా ఒకే ఫ్రేమ్ లో కనిపించడంతో సినీ అభిమానులు నెట్టింట వైరల్ చేస్తున్నారు.