కరోనా గుప్పిట్లో టాలీవుడ్.. వైరస్ బారిన పడుతున్న స్టార్స్..!

ప్రస్తుతం కరోనా సెకండ్ వేవ్ దేశ వ్యాప్తంగా ప్రజలందరినీ భయ భ్రాంతులకు గురి చేస్తోంది. గత మూడు వారాలుగా రోజు రోజుకూ పాజిటివ్ కేసులు పెరగడమే కాకుండా అధిక సంఖ్యలో మరణాలు సంభవిస్తున్నాయి. ఇక సినిమా ఇండస్ట్రీ మీద మహమ్మారి ప్రభావం గతేదాడి కంటే ఈసారి ఎక్కువగా ఉండే అవకాశం ఉందని నిపుణులు చెబుతున్నారు. థియేటర్స్ క్లోజ్ అవడంతో సినిమాల విడుదలలు పోస్ట్ పోన్ అవుతున్నాయి. జాగ్రత్తలు తీసుకుంటూ సినిమా షూటింగ్స్ చేసుకుందాం అనుకున్న వారు కూడా రోజుకో స్టార్ కరోనా బారిన పడుతుండటం కలవరపెడుతోంది.

టాలీవుడ్ లో ఈ మధ్య షూటింగ్‌ లలో పాల్గొంటున్న సినీ ప్రముఖులు చాలా మంది ఒక్కొక్కరుగా కరోనా బారిన పడుతున్నారు. దీంతో మిగతా చిత్ర బృందం మరియు సిబ్బంది ఖంగారుపడి హోమ్ క్వారంటైన్ లో ఉండాల్సి వస్తోంది. దీంతో ఆ సినిమా షూటింగ్ లు అర్థాంతరంగా ఆగిపోయే పరిస్థితులు ఏర్పడుతున్నాయి. క్యారక్టర్ ఆర్టిస్ట్ కు కరోనా వచ్చిన మొత్తం షూటింగ్ స్టాప్ చేస్తున్నారు. ఇటీవల పవన్ కళ్యాణ్ కు కోవిడ్ పాజిటివ్ గా తేలడంతో 'హరి హర వీరమల్లు' - 'అయ్యప్పనుమ్ కొశీయుమ్' తెలుగు రీమేక్స్ షూటింగ్ లకు బ్రేక్ పడింది. అలానే అల్లు అర్జున్ కరోనా సోకడంతో 'పుష్ప' షూటింగ్ ఆపేసి అందరూ టెస్టులు చేపించుకున్నారు.

తాజాగా జూనియర్ ఎన్టీఆర్ మహమ్మారి బారిన పడ్డారు. దీంతో ఇప్పుడు 'ఆర్.ఆర్.ఆర్' టీమ్ తో పాటుగా 'ఎవరు మీలో కోటీశ్వరుడు' షో నిర్వాహకులు అందరూ టెన్షన్ పడే పరిస్థితి ఏర్పడింది. ఇటీవలే అలియా భట్ కోవిడ్ నుంచి కోలుకున్నారనుకునే లోపే 'ఆర్.ఆర్.ఆర్' బృందంలో మరొకరు దీని బారిన పడటంతో ఫ్యాన్స్ కలవరపడుతున్నారు. ఇక హీరోయిన్ పూజా హెగ్డే కు కరోనా సోకడంతో ఆమె నటించే సినిమాల చిత్రీకరణ ఆపేశారు. ఇలా స్టార్స్ వైరస్ బారిన పడటంతో టాలీవుడ్ లో క్రేజీ ప్రాజెక్ట్స్ అన్నీ షూటింగ్స్ ఆపేసుకున్నారు.