ఓటిటి వైపు టాలీవుడ్ స్టార్స్..!

కరోనా ఎప్పుడైతే దేశంలోకి ఎంటరయిందో అప్పటినుండి ప్రతి రంగంలో ఎన్నో మార్పులు జరుగుతున్నాయి. అందులో భాగంగానే సినిమా రంగంలో కూడా చాలా మార్పులు చోటుచేసుకున్నాయి. నిజానికి ఎక్కువగా మార్పు చెందింది సినీరంగమే అని చెప్పాలి. ఎందుకంటే బిజినెస్ - పాలిటిక్స్ లాంటి వాటిలో మార్పులు సహజంగానే కనిపిస్తుంటాయి. కానీ సినిమా రంగంలో మార్పులు అరుదుగా కనిపిస్తాయి. అందులోను టాలీవుడ్ ఇండస్ట్రీలో హీరోలు - హీరోయిన్స్ మార్పు దిశగా అడుగులు వేస్తున్నారంటే కారణం ఓటిటిలు. దేశంలో కరోనా మొదలైనప్పుడే ఓటిటిల వాడకం కూడా మొదలైంది.

ఇదివరకు ఓటిటి అంటే సినిమా థియేటర్స్ లో ఆడిన తర్వాత ఓటిటిలోకి వచ్చేవి. ఓ ఏడాదికి ముందు కేవలం ఇదే ప్రాసెస్ జరిగేది. కానీ ఎప్పుడైతే ఓటిటిల వాడకం పెరిగిందో.. అప్పటినుండి కొత్త సినిమాలు కూడా నేరుగా ఓటిటి రిలీజ్ అవుతున్నాయి. అలాగే ఓటిటిలకు అలవాటు పడిన ప్రేక్షకులు కూడా ఎలాగో థియేటర్స్ ఓపెన్ లేవు కదా సినిమాలు ఓటిటి రిలీజ్ చేయాలనీ అడుగుతున్నారు. అయితే ఈ క్రమంలో స్టార్ హీరోలు - హీరోయిన్స్ ఓటిటి మూవీస్ - వెబ్ సిరీస్ లలో నటించేందుకు సిద్ధం అవుతున్నారు. తాజా సమాచారం ప్రకారం.. మెగాస్టార్ చిరంజీవి - విక్టరీ వెంకటేష్ కూడా ఓటిటిలో అడుగు పెట్టనున్నట్లు టాక్.

ఇప్పటికే బాలీవుడ్ - కోలీవుడ్ అనే తేడాలు లేకుండా యాక్టర్స్ ఓటిటి మూవీస్ లో నటిస్తున్నారు. ప్రోగ్రాంస్ కూడా చేస్తున్నారు. అయితే మెగాస్టార్ చిరంజీవి - అల్లు అరవింద్ కాంబినేషన్ లో ఆహా ఓటిటి కోసం ఓ స్క్రిప్ట్ సిద్ధం అవుతుందని టాక్. అలాగే మెగాస్టార్ కూడా ఓటిటి ఎంట్రీకి సిద్ధంగానే ఉన్నట్లు సానుకూలంగానే స్పందించినట్లు తెలుస్తుంది. అలాగే మెగాస్టార్ తో పాటు విక్టరీ వెంకటేష్ కూడా డిజిటల్ ఎంట్రీ చేయనున్నట్లు సమాచారం. ప్రొడ్యూసర్ సురేష్ బాబు వెంకటేష్ కోసం ఓ ఓటిటి స్క్రిప్ట్ సిద్ధం చేయిస్తున్నాడట. ఆల్రెడీ బాలీవుడ్ లో స్టార్ యాక్టర్స్ అందరూ ఓటిటిలో కూడా బిజీగా నటిస్తున్నారు. మరి టాలీవుడ్ స్టార్ హీరోలు ఎప్పుడు అడుగు పెడతారో అని ఫ్యాన్స్ వెయిట్ చేస్తున్నారు. ప్రస్తుతం సినిమాలతో బిజీగా ఉన్నారు కాబట్టి ఏదైనా కరోనా తరవాతే అని టాక్ నడుస్తుంది.