కుదిరితే దసరా .. లేదంటే సంక్రాంతి అంటున్న స్టార్ హీరోలు!

చిరంజీవి - కొరటాల శివ కాంబినేషన్లో 'ఆచార్య' రూపొందుతోంది. భారీ బడ్జెట్ తో ఈ సినిమా నిర్మితమవుతోంది. చిరూ సరసన నాయికగా కాజల్ నటిస్తున్న ఈ సినిమాలో, చరణ్ జోడీగా పూజా హెగ్డే అలరించనుంది. కొన్ని రోజుల పాటు చిత్రీకరణ జరిపితే ఈ సినిమా షూటింగు పార్టు పూర్తవుతుంది. మెగా అభిమానులందరి దృష్టి ఇప్పుడు ఈ సినిమాపైనే ఉంది. ఇక బాలకృష్ణ సినిమా 'అఖండ' పరిస్థితి కూడా ఇంచుమించు ఇలాగే ఉంది. బాలకృష్ణ డిఫరెంట్ లుక్స్ .. బోయపాటి కాంబినేషన్ కావడంతో ఈ సినిమాపై కూడా అంచనాలు ఒక రేంజ్ లో ఉన్నాయి.

ప్రభాస్ కథనాయకుడిగా 'రాధే శ్యామ్' రూపొందుతున్న సంగతి తెలిసిందే. ఈ సినిమాకి సంబంధించి ఇంకా కొంత వర్క్ మిగిలి ఉందని అంటున్నారు. పూజా హెగ్డే నాయికగా సందడి చేయనున్న ఈ సినిమా కోసం భారీస్థాయిలో ఖర్చు చేశారు. పాన్ ఇండియా సినిమాగా భారీ స్థాయిలో విడుదల చేయనున్నారు. కరోనా వలన షూటింగు విషయంలో జాప్యం జరగడం .. థర్డ్ వేవ్ భయం ఇంకా పొంచి ఉండటం వలన, ఈ రెండు సినిమాలను ఎప్పుడు విడుదల చేయాలనే విషయంలో అయోమయం నెలకొని ఉంది. అందువలన కుదిరితే దసరాకీ .. లేదంటే సంక్రాంతికి అన్నట్టుగా మేకర్స్ ఉన్నారు.

దసరాకి ఈ సినిమాలు థియేటర్లకు రావాలనే అంతా కోరుకుంటున్నారు. ఎందుకంటే సంక్రాంతిని టార్గెట్ గా పెట్టుకుని కొన్ని సినిమాలు రెడీ అవుతున్నాయి. పవన్ కల్యాణ్ - క్రిష్ కాంబినేషన్లోని 'హరిహర వీరమల్లు' ఆ దిశగా నిర్మాణం జరుపుకుంటోంది. మహేశ్ బాబు హీరోగా రూపొందుతున్న 'సర్కారువారి పాట' కూడా సంక్రాంతికి రానున్నట్టుగా ముందుగానే చెప్పేశారు. ఇక 'పుష్ప' ఫస్టు పార్టును సంక్రాంతి బరిలోకి దింపాలనే ఆలోచనలో ఉన్నారు. ఇంతమంది స్టార్ హీరోల సినిమాలు ఒక్కసారిగా థియేటర్లపై దండయాత్ర చేయనున్నాయన్నమాట. అలాంటి సందడి వాతావరణం చూడాలనే అందరూ కోరుకుంటున్నారు కూడా.