టాలీవుడ్: ఈ ఏడాదిని విజయవంతంగా ముగిస్తారా..?

కరోనా పాండమిక్ కారణంగా గత రెండేళ్లుగా ఒడిదుడుకులను ఎదుర్కొన్న ఇండస్ట్రీ.. మళ్ళీ మెల్లిగా ట్రాక్ లోకి వచ్చింది. మేకర్స్ ఎప్పటిలాగే వారం వారం సరికొత్త సినిమాలతో ప్రేక్షకులను వినోదాన్ని అందిస్తూ వస్తున్నారు. 2022 లో ఇప్పటి వరకూ అనేక చిత్రాలు టాలీవుడ్ బాక్సాఫీస్ వద్ద సందడి చేసాయి. అందులో కొన్ని బ్లాక్ బస్టర్స్ గా నిలిస్తే.. మరికొన్ని సూపర్ హిట్లు - హిట్లుగా నిలిచాయి. ఇంకొన్ని మాత్రం ఆడియన్స్ ని ఆకట్టుకోలేక ప్లాప్స్ గా మిగిలాయి.

ఇప్పుడు దాదాపు ఏడాది చివరకు వచ్చేసాం. డిసెంబర్ లో బాక్సాఫీస్ వద్ద తమ అదృష్టాన్ని పరీక్షించుకోడానికి అనేక చిత్రాలు వస్తున్నాయి. సాధారణంగా డిసెంబర్ నెలను సినిమాలకు మంచి సీజన్ గా భావిస్తుంటారు. గతంలో స్టార్ హీరోలు క్రిస్మస్ కు తమ చిత్రాలని రిలీజ్ చేయటానికి ఆసక్తి కనబర్చేవారు. గతేడాది 'అఖండ' 'పుష్ప' 'శ్యామ్ సింగరాయ్' వంటి చిత్రాలు సందడి చేశాయి. కానీ ఈసారి మాత్రం చిన్న మీడియం రేంజ్ హీరోల సినిమాలు వస్తున్నాయి.

టాలెంటెడ్ యాక్టర్ అడివి శేష్ హీరోగా నటించిన "హిట్: ది సెకండ్ కేస్" చిత్రం డిసెబర్ 2న విడుదల కాబోతోంది. నేచురల్ స్టార్ నాని సమర్పిస్తున్న ఈ క్రైమ్ థ్రిల్లర్ కు శైలేష్ కొలను దర్శకత్వం వహిస్తున్నారు. ఇది 'హిట్: ది ఫస్ట్ కేస్' చిత్రానికి సీక్వెల్. ఇప్పటి వరకూ వచ్చిన టీజర్ - ట్రైలర్ మంచి రెస్పాన్స్ తెచ్చుకొని, సినిమాపై అంచనాలు రెట్టింపు చేశాయి.

కోలీవుడ్ స్టార్స్ విష్ణు విశాల్ మరియు ఐశ్వర్య లక్ష్మీ హీరోహీరోయిన్లుగా నటిస్తోన్న చిత్రం "మట్టి కుస్తీ". చెల్లా అయ్యావు దర్శకత్వంలో తెరకెక్కుతున్న ఈ చిత్రాన్ని డిసెంబర్ 2న తెలుగు తమిళ భాషల్లో విడుదల చేయటానికి సన్నాహాలు చేస్తున్నారు. మాస్ మహారాజా రవితేజ సమర్పిస్తుండటంతో ఈ సినిమాపై అందరి దృష్టి నెలకొంది.

డిసెంబరు రెండో వారంలో "పంచతంత్రం" అనే సినిమా ప్రేక్షకుల ముందుకు రానుంది. ఇందులో బ్రహ్మానందం - సముద్రఖని - కలర్స్ స్వాతి - శివాత్మిక రాజశేఖర్ - నరేష్ ఆగస్త్య - రాహుల్ విజయ్ తదితరులు ఇతర ప్రధాన పాత్రలు పోషించారు. హర్ష పులిపాక దర్శకత్వం వహిస్తున్న ఈ చిత్రాన్ని వచ్చే నెల 9న రిలీజ్ చేయనున్నారు. అదే రోజున 'రాజయోగం' అనే మరో చిన్న సినిమా కూడా అదృష్టాన్ని పరీక్షించుకోనుంది.

సినీ అభిమానులు ఆసక్తిగా ఎదురుచూస్తున్న ''అవతార్ 2'' చిత్రం డిసెంబర్ 16న విడుదల కాబోతోంది. జేమ్స్ కామెరూన్ తెరకెక్కించిన ఈ సినిమాపై భారీ అంచనాలు నెలకొన్నాయి. తెలుగుతో సహా ప్రపంచ వ్యాప్తంగా 160 భాషల్లో ఈ చిత్రం రిలీజ్ కానుంది. ఈ నేపథ్యంలో ఆ వారంలో ఇతర తెలుగు చిత్రాలేవీ థియేటర్లలోకి రావడం లేదు.

మాస్ రాజా రవితేజ నటిస్తున్న 'ధమాకా' చిత్రం క్రిస్మస్ స్పెషల్ గా డిసెంబర్ 23న ప్రేక్షకుల ముందుకి రాబోతోంది. త్రినాథరావు నక్కిన ఈ సినిమాకి దర్శకత్వం వహిస్తున్నారు. ప్రమోషన్ కంటెంట్ తో ఆసక్తిని కలిగించిన ఈ చిత్రాన్ని తెలుగు, హిందీ భాషల్లో విడుదల చేయనున్నారు.

నిఖిల్ సిద్ధార్థ్ - అనుపమ పరమేశ్వరన్ జంటగా నటించిన "18 పేజెస్" చిత్రం కూడా డిసెంబర్ 23 విడుదల కానుంది. డైరెక్టర్‌ సుకుమార్‌ కథ అందించిన ఈ సినిమాకి పల్నాటి సూర్య ప్రతాప్ దర్శకత్వం వహించారు. 'కార్తికేయ-2' వంటి బ్లాక్ బస్టర్ తర్వాత నిఖిల్ నుంచి రాబోతున్న ఈ రొమాంటిక్ మూవీపై అందరిలో అంచనాలు నెలకొన్నాయి.

సంతోష్ శోభన్ హీరోగా నందినీ రెడ్డి దర్శకత్వంలో తెరకెక్కుతున్న చిత్రం ''అన్నీ మంచి శకునములే''. క్రిస్మస్ కానుకగా డిసెంబరు 21న ఈ లవ్ అండ్ ఫ్యామిలీ ఎంటర్టైనర్ ప్రేక్షకుల ముందుకి తీసుకురావాలని చూస్తున్నారు. ఇందులో మాళవిక నాయర్ హీరోయిన్ గా నటిస్తోంది.

యాక్షన్ హీరో విశాల్ నటించిన తమిళ డబ్బింగ్ మూవీ "లాఠీ" కూడా క్రిస్మస్ రిలీజుల జాబితాలోకి వచ్చి చేరింది. వినోద్ కుమార్ దర్శకత్వంలో తెరకెక్కిన ఈ హై ఆక్టేవ్ యాక్షన్ ఎంటర్టైనర్ ని పాన్ ఇండియా స్థాయిలో తెలుగు, తమిళ్, హిందీ, మలయాళం, కన్నడ భాషల్లో డిసెంబరు 22న రిలీజ్ చేయనున్నారు.

కృష్ణవంశీ దర్శకత్వంలో ప్రకాష్ రాజ్ - రమ్యకృష్ణ ప్రధాన పాత్రల్లో తెరకెక్కించిన ''' చిత్రాన్ని కూడా డిసెంబర్ లోనే విడుదల చేయటానికి ప్లాన్ చేస్తున్నట్లు తెలుస్తోంది. అలానే దగ్గుబాటి వారసుడు అభిరామ్ హీరోగా తేజ దర్శకత్వం వహించిన "అహింస" సినిమాని వచ్చే నెలలోనే ప్రేక్షకుల ముందుకి తీసుకురావాలని చూస్తున్నారు. ఇక సుధీర్ బాబు నటిస్తున్న "హంట్" చిత్రాన్ని కూడా డిసెంబర్ లోనే రిలీజ్ చేయనున్నారని టాక్ వినిపిస్తోంది.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.