సరికొత్త కాంబినేషన్లు సెట్ అవుతున్నాయి..!

పాండమిక్ తర్వాత సినీ ఇండస్ట్రీలో ఎప్పటిలాగే అన్ని కార్యకలాపాలు సాగుతున్నాయి. అయితే చెప్పుకోడానికి పెద్ద పెద్ద సినిమాలు వస్తున్నాయి కానీ.. ఈ ఏడాది బాక్సాఫీస్ వద్ద పెద్దగా కళ కనిపించడం లేదు. ఓటీటీకి అలవాటు పడిపోయిన జనాలను, ఎలాంటి కంటెంట్ తో థియేటర్లకు రప్పించాలనే విషయంలో ఎవరికీ స్పష్టత రావడం లేదు. ఇలాంటి పరిస్థితుల్లో తమ కలానికి మరింత పదునుపెట్టి సరికొత్త కథలతో వస్తున్నారు మన ఫిలిం మేకర్స్. వాటితో హీరోలను మెప్పిస్తూ కొత్త కాంబినేషన్స్ కు శ్రీకారం చుడుతున్నారు.

ఇటీవల 'థాంక్యూ' సినిమాతో పలకరించిన యువసామ్రాట్ అక్కినేని నాగచైతన్య.. ఇప్పటికే తమిళ దర్శకుడు వెంకట్ ప్రభు తో ఓ ద్విభాషా చిత్రాన్ని అనౌన్స్ చేశాడు. ఇదే క్రమంలో 'సర్కారు వారి పాట' ఫేమ్ పరశురాం పెట్లా తో ఓ సినిమా చేయడానికి రెడీ అవుతున్నాడు. అంతేకాదు 'పెళ్లి చూపులు' దర్శకుడు తరుణ్ భాస్కర్ తో కథా చర్చలు జరుపుతున్నాడు. వీరే కాకుండా మరికొందరు క్రేజీ దర్శకులతో పని చేయడానికి చైతూ ఉత్సాహం చూపిస్తున్నాడు.

'ది వారియర్' గా ప్రేక్షకుల ముందుకు వచ్చిన ఉస్తాద్ హీరో రామ్ పోతినేని.. ఓ పాన్ ఇండియా మూవీ కోసం బోయపాటి శ్రీను తో జట్టు కట్టడానికి రెడీ అవుతున్నాడు. ఇదే క్రమంలో హరీష్ శంకర్ మరియు అనిల్ రావిపూడి వంటి స్టార్ డైరెక్టర్స్ తో కథా చర్చలు జరుపుతున్నారని తెలిసింది. త్వరలోనే ఈ విషయం పై క్లారిటీ వచ్చే అవకాశం ఉంది.

స్టైలిష్ డైరెక్టర్ సురేందర్ రెడ్డి తో కలిసి 'ఏజెంట్' అనే పాన్ ఇండియా మూవీతో రాబోతున్న యూత్ కింగ్ అఖిల్ అక్కినేని.. 'వకీల్ సాబ్' ఫేమ్ శ్రీరామ్ వేణు దర్శకత్వంలో ఓ సినిమా చేయడానికి గ్రీన్ సిగ్నల్ ఇచ్చారని గత కొన్ని రోజులుగా వార్తలు వినిపిస్తున్నాయి. స్టార్ ప్రొడ్యూసర్ దిల్ రాజు ఈ కాంబినేషన్ ను సెట్ చేశారని అంటున్నారు. దీనికి 'తమ్ముడు' అనే టైటిల్ కూడా ప్రచారంలోకి వచ్చింది. మరి ఈ ప్రాజెక్ట్ పై అధికారిక ప్రకటన చేస్తారేమో చూడాలి.

'మాచర్ల నియోజవర్గం' సినిమాని రిలీజ్ కు రెడీ చేసిన యూత్ స్టార్ నితిన్.. దర్శక రచయిత వక్కంతం వంశీ తో ఓ సినిమా చేయనున్నాడు. దీని తర్వాత 'భీమ్లా నాయక్' ఫేమ్ సాగర్ కె.చంద్ర తో నితిన్ జత కట్టనున్నారని.. ఇప్పటికే దర్శకుడు చెప్పిన యాక్షన్ కథకు పాజిటివ్ గా స్పందించారని రూమర్స్ వినిపిస్తున్నాయి

ప్రస్తుతం సుకుమార్ బ్యానర్ లో ఓ మిస్టిక్ థ్రిల్లర్ లో నటిస్తున్న మెగా మేనల్లుడు సాయితేజ్.. త్వరలో సంపత్ నంది తో రచ్చ చేయడానికి రెడీ అవుతున్నాడని సమాచారం. సితార ఎంటర్టైన్మెంట్స్ బ్యానర్ లో ఈ సినిమా రూపొందనుంది. దీంతో పాటుగా తన మేనమామ పవన్ కళ్యాణ్ తో కలిసి సముద్రఖని దర్శకత్వంలో 'వినోదయ సీతమ్' అనే తమిళ రీమేక్ లో నటించనున్నాడు తేజ్.

'ఎఫ్ 3' సినిమాతో ప్రేక్షకులను నవ్వించిన మెగా ప్రిన్స్ వరుణ్ తేజ్.. 'ది ఘోస్ట్' ఫేమ్ ప్రవీణ్ సత్తారు దర్శకత్వంలో ఓ మూవీ చేయనున్నాడు. దీని తర్వాత 'సాహో' ఫేమ్ సుజీత్ తో ఓ మూవీ ప్లాన్ చేస్తున్నాడని టాక్ వినిపిస్తోంది.

ఇలా టాలీవుడ్ లో ఇప్పుడు పలు ఆసక్తికరమైన కొత్త కాంబినేషన్లు సెట్ అవుతున్నాయి. పాండమిక్ తర్వాత మారిన ప్రేక్షకుల అభిరుచిని దృష్టిలో ఉంచుకుని సరికొత్త కథలతో సినిమాలు చేయడానికి సిద్ధం అవుతున్నారు. వీటిల్లో కొన్ని కాంబోలో ఇప్పటికే ఖరారు అవ్వగా.. మరికొన్ని చర్చల దశలో ఉన్నాయి. ఈ ప్రాజెక్ట్స్ గురించి స్పష్టత రావాలంటే అధికారిక ప్రకటనలు వచ్చే వరకు ఆగాల్సిందే.