స్టార్ హీరో ఖరీదైన కారు సినీ ఫక్కీలో చోరీ

హాలీవుడ్ స్టార్ హీరో టామ్ క్రూజ్ కు చెందిన కోటి రూపాయల లగ్జరీ కారును దొంగలు దోచుకెళ్లారు. సినీ ఫక్కీలో ఈ కారు చోరీకి గురికావడం విశేషం. సినీ హీరో కారును అంతే నాటకీయంగా దొంగలు తీసుకెళ్లడం విశేషం.

అడ్వాన్స్ డ్ టెక్నాలజీ ఉన్న కారును పక్కా స్కెచ్ తో అవలీలగా దొంగలు ఎత్తుకెళ్లిపోయారు. దాదాపు కోటి రూపాయల విలువగల ఈ బీఎండబ్ల్యూను చివరకు పోలీసులు ఎలాగోలా ట్రేస్ చేశారు. కానీ కారులోని విలువైన లగేజీ, కొంత డబ్బును మాత్రం దొంగలు ఎత్తుకెళ్లిపోయారు.

ప్రస్తుతం ఇంగ్లండ్ లోని బర్మింగ్ హమ్ లో మిషన్ ఇంపాజిబుల్ ఏడో పార్ట్ షూటింగ్ జరుగుతోంది. ఓ లగ్జరీ హోటల్ లో సినిమా యూనిట్ బస చేసింది. అయితే స్టార్ హీరో టామ్ క్రూజ్ బయట పార్కింగ్ చేసిన కాస్ట్ లీ కారును దొంగలు ఎత్తుకెళ్లిపోయారు.

మోడ్రన్ కారుల అన్నీ కీలెస్ గా, ఇగ్నిషన్ ఫోబ్స్ తో వస్తున్నాయి. ఇది దొంగలకు అనుకూలంగా మారుతోంది. వైర్ లెస్ ట్రాన్స్ మీటర్లను ఉపయోగించి దొంగతనాలకు పాల్పడుతున్నారు. ఇదే తీరులో టామ్ క్రూజ్ కారును కూడా చోరీ చేశారు.

కారుకు దగ్గరగా నిలబడ్డ దొంగలు.. ఫ్రీక్వెన్సీ మీటర్ల ద్వారా ఫోబ్ సిగ్నల్ ను క్యాప్చర్ చేయగలిగారు. అదే టైంలో ఒరిజినల్ ఫోబ్ ను రేడియో ఫ్రీక్వెన్సీ ఆధారంగా పనిచేయకుండా చేశారు. అనంతరం దర్జాగా కారును వేసుకొని వెళ్లిపోయారు.

ఇక కారు చోరీకి గురైందని గుర్తించిన టామ్ క్రూజ్ బాడీగార్డులు పోలీసులకు సమాచారం అందించారు. ట్రాకింగ్ సిస్టం ద్వారా కారును ట్రేస్ చేశారు. స్మెత్ విక్ విలేజ్ లో కారును గుర్తించారు. అయితే కారు దొరికినప్పటికీ అందులోని లగేజీ, కొంత డబ్బు మాయమైనట్లు తెలుస్తోంది.

ఈ కారు విలువ దాదాపు లక్ష పౌండ్లు( మన కరెన్సీలో కోటి రూపాయలు). బీఎండబ్ల్యూ ఎక్స్7 దీని పేరు. ఇది 4 సెకన్లలో 96 కి.మీల వేగాన్ని అందుకుంటుంది. అత్యధికంగా 249 కి.మీల వేగంతో ప్రయాణిస్తుంది. మిషన్ ఇంపాజిబుల్ షూటింగ్ కోసం ఇంగ్లండ్ వచ్చిన ఈ స్టార్ హీరోకు ఇప్పుడు కారు దొంగతనం షాకిచ్చినట్టైంది.