2023లో టాప్-5 బాలీవుడ్ సినిమాలివే

వెరైటీ వెరైటీ సినిమాల‌తో 2022లో బాలీవుడ్ లో చేయ‌ని ప్ర‌యోగం లేదు. కానీ మేటి ద‌ర్శ‌క‌నిర్మాత‌లు స్టార్ హీరోలు చేసిన ప్ర‌య‌త్నాలేవీ ఫ‌లించ‌లేదు. గంగలో పోసిన ప‌న్నీరులా బ‌డ్జెట్లు క‌ర్స‌యిపోయ్యాయి త‌ప్ప రిట‌ర్నులు తిరిగి రాలేదు. దీంతో బాలీవుడ్ తీవ్ర నిరాశ‌లో కూరుకుపోయింది. ఇయ‌ర్ ఎండ్ లో అయినా ఊర‌ట ల‌భిస్తుంద‌ని ఎంతో ఆశించిన ర‌ణ‌వీర్ `స‌ర్క‌స్` కూడా తీవ్రంగా నిరాశ‌ప‌ర‌చ‌డంతో `ఈ బాలీవుడ్ కి ఏమైంది?` అంటూ జోకులేయ‌డం మొద‌లెట్టారు. 2022 బాలీవుడ్ కి బ్యాడ్ ఇయ‌ర్. కానీ 2023 అలా కాదు. నూత‌న‌ సంవత్సరం కొన్ని ఎగ్జ‌యిట్ చేసే చిత్రాలతో ఆశాజనకంగా కనిపిస్తోంది. 2023లో మోస్ట్ అవైటెడ్ టాప్ 5 బాలీవుడ్ సినిమాల జాబితాను ప‌రిశీలిస్తే వివ‌రాలు ఇలా ఉన్నాయి.

దాదాపు నాలుగు సంవత్సరాల తర్వాత కింగ్ ఖాన్ షారుఖ్ తిరిగి వ‌స్తున్నాడు. బాక్సాఫీస్ వ‌ద్ద `పఠాన్`తో సంచ‌ల‌నం సృష్టించాల‌ని క‌ల‌లుగంటున్నాడు. భారీ బ‌డ్జెట్ చిత్రం `జీరో` డిజాస్ట‌ర్ అయ్యాక ఈసారి భారీ యాక్షన్ థ్రిల్లర్ ని ఎంపిక చేసుకున్నాడు. YRF స్పై యూనివర్స్ లో ఇది ఒక భాగం కావ‌డంతో స‌ర్వ‌త్రా ఉత్కంఠ నెల‌కొంది. ఇందులో దీపికా పదుకొనే - జాన్ అబ్రహం లాంటి టాప్ స్టార్లు కూడా నటిస్తున్నారు. టీజర్‌- పోస్టర్ లు- పాటలు అభిమానుల్లో హీట్ పెంచాయి. ఉత్కంఠ రేపే యాక్ష‌న్ థ్రిల్స్.. భారీ సాహ‌స‌ఘ‌ట్టాల‌తో ఈ చిత్రం ఆద్యంతం గొప్ప ఎంట‌ర్ టైన‌ర్ గా నిలుస్తుంద‌ని ద‌ర్శ‌కుడు సిద్ధార్థ్ ఆనంద్ చెబుతున్నారు. 25 జనవరి 2023న మూవీ విడుదల కానుంది.

ఇదే ఏడాది ఖాన్ ల త్ర‌యంలో భాయ్ సల్మాన్ ఖాన్ రెండు పెద్ద విడుదలలతో హీట్ పుట్టించ‌బోతున్నాడు. టైగర్ ఫ్రాంచైజీ నుంచి మూడో భాగం విడుద‌ల కోసం అభిమానులు ఎంతో ఎగ్జ‌యిటింగ్ గా వేచి ఎదురుచూస్తున్నారు. ఈ చిత్రంలో కత్రినా కైఫ్ యాక్ష‌న్ క్వీన్ గా క‌నిపించ‌నుండ‌డం ప్ర‌ధాన అస్సెట్ కానుంది. షారుఖ్ ఖాన్ `పఠాన్` పాత్ర ఇందులో అతిధి పాత్రగా క‌నిపిస్తుంది. ఇది స్పై యాక్ష‌న్ యూనివ‌ర్శ్ ని మ‌రో లెవ‌ల్ కి తీసుకెళ్లే ప్ర‌య‌త్నంగా వైఆర్ ఎఫ్ సంస్థ ప్ర‌క‌టించడంతో ఫ్యాన్స్ లో ఉత్కంఠ నెల‌కొంది.

ఏక్ థా టైగ‌ర్ - టైగ‌ర్ జిందా హై చిత్రాలు ఈ ఫ్రాంఛైజీలో బ్లాక్ బ‌స్ట‌ర్ విజ‌యాలు సాధించ‌డంతో ఇప్పుడు టైగ‌ర్ 3 పైనా భారీ అంచ‌నాలేర్ప‌డ్డాయి. ఈ యాక్షన్ చిత్రం విజువల్ ట్రీట్ గా ఉంటుంద‌ని ఇప్ప‌టికే టాక్ న‌డుస్తోంది. దీపావళికి విడుదల చేయాలని మేకర్స్ లక్ష్యంగా పెట్టుకున్నారు.

ఈ కొత్త సంవ‌త్స‌రం విడుద‌ల‌కు రానున్న మోస్ట్ అవైటెడ్ మూవీస్ జాబితాలో ర‌ణ‌బీర్ `యానిమ‌ల్` కూడా ఒక‌టి. బ్ర‌హ్మాస్త్ర‌తో పాన్ ఇండియా న‌టుడిగా ప‌రిచ‌య‌మైన‌ రణబీర్ కపూర్ త‌న ప‌రిధిని సౌత్ కి విస్త‌రించాల‌ని గ‌ట్టి ప‌ట్టుద‌ల‌తో ఉన్నాడు. అదే క్ర‌మంలో అర్జున్ రెడ్డి- క‌బీర్ సింగ్ చిత్రాల‌ ద‌ర్శ‌కుడు సందీప్ వంగా(మ‌న తెలుగు వాడు)తో `యానిమ‌ల్` ని ట్ర‌య‌ల్ గా ఎంచుకున్నాడు. ఈ చిత్రంలో మునుపెన్నడూ చూడని అవతారంలో ర‌ణ‌బీర్ క‌పూర్ క‌నిపించ‌బోతున్నాడు. యానిమ‌ల్ ఒక‌ సైకలాజికల్ థ్రిల్లర్. ఈ చిత్రంపై భారీ అంచ‌నాలున్నాయి. మేకర్స్ మొదటి పోస్టర్ ను ఆవిష్కరించ‌గా చ‌క్క‌ని స్పంద‌న వ‌చ్చింది. జ‌న‌వ‌రి 1న విడుద‌లైన‌ కపూర్ బోయ్ ఫ‌స్ట్‌ లుక్ అభిమానులను మరింత ఉత్సాహపరిచింది. వివాదాస్పద కబీర్ సింగ్ తర్వాత సందీప్ రెడ్డి వంగాకు ఇది రెండో హిందీ చిత్రం. ఇందులో అనిల్ కపూర్- ట్రిప్తి డిమ్రీ- రష్మిక మందన్న త‌దిత‌రులు న‌టిస్తున్నారు.

రాకీ ఔర్ రాణి కి ప్రేమ్ కహానీ.. ఈ టైటిల్ తోనే బోలెడంత హైప్ పెంచారు క‌ర‌ణ్ జోహార్ అండ్ కో. హిస్టారిక‌ల్ మూవీ `తఖ్త్` వాయిదా పడినప్పటి నుండి కరణ్ జోహార్ దర్శకుడిగా తిరిగి దూసుకొస్తాడని అభిమానులు వేచి చూస్తున్నారు. అందుకే ఆయ‌న రాకీ ఔర్ రాణి కోసం చాలా శ్ర‌మిస్తున్నార‌ని స‌మాచారం. ఈ సినిమాను ప్రకటించినప్పటి నుంచి బాలీవుడ్ వ‌ర్గాల్లో బోలెడంత‌ సందడి నెలకొంది. రణవీర్ సింగ్ స్నీక్ పీక్ లుక్ తో కొన్ని షాట్లు అభిమానులను ఆశ్చర్యపరిచాయి. ఈ రోమ్ కామ్ లో జాతీయ అవార్డుల చిత్రం `గల్లీ బాయ్` పెయిర్ `ర‌ణ‌వీర్ సింగ్- అలియా భట్‌` జంట‌ తిరిగి న‌టిస్తుండ‌డంతో ఆస‌క్తి నెల‌కొంది. ఈ చిత్రంలో జోహార్ ట్రేడ్ మార్క్ ఎలిమెంట్స్-భావోద్వేగాలు డ్రామా - దుబారా లాంటి అంశాలు ఆక‌ట్టుకుంటాయ‌ని భావిస్తున్నారు.

కింగ్ ఖాన్ షారూఖ్‌ ఈ ఏడాదిలో వ‌రుస చిత్రాల‌తో అల‌రించ‌నున్నాడు. ఇందులో `డుంకీ` ఒక‌టి. ఇమ్మిగ్రేషన్ నేప‌థ్యంలో ర‌క్తి కట్టించే సోష‌ల్ డ్రామా క‌థ‌తో ఈ మూవీ తెర‌కెక్కుతోంది. దీనికోసం షారూఖ్ ఖాన్ రాజ్ కుమార్ హిరాణీతో కలిసి పనిచేస్తున్నారు. హిరాణీ బాలీవుడ్ లో సంచ‌ల‌న విజ‌యాలు సాధించిన పీకే- 3 ఇడియ‌ట్స్ లాంటి సినిమాల‌ను రూపొందించారు. కింగ్ ఖాన్ తో అత‌డి క‌ల‌యిక ఉత్కంఠ క‌లిగిస్తోంది. బాలీవుడ్ ని పీడ క‌ల‌ల నుంచి బ‌య‌ట‌ప‌డేసే స‌త్తా ఈ కాంబినేషన్ కి ఉంద‌ని న‌మ్మొచ్చు. 2009లోనే హిరాణీతో `3 ఇడియట్స్‌` చేయాల్సి ఉండ‌గా కింగ్ ఖాన్ కాల్షీట్ల‌ సమస్య కారణంగా తిరస్కరించినట్లు క‌థ‌నాలొచ్చాయి. ఆ త‌ర‌వాత హిరాణీతో SRK మొదటి కలయిక ఇదే. డుంకీలో తాప్సీ పన్ను క‌థానాయిక‌గా నటిస్తోంది. డిసెంబర్ 2023న ఈ చిత్రం విడుదలకు సిద్ధంగా ఉంది.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.