చేతిలో ఉన్న‌వి అన్నీ వ‌దులుకుంటున్న అగ్ర నాయిక‌!

సౌత్ అగ్ర క‌థానాయిక‌గా సుమారు రెండు ద‌శాబ్ధాల కెరీర్ ని కొన‌సాగించింది కాజ‌ల్ అగ‌ర్వాల్. ఇటీవ‌లే బిజినెస్ మేన్ కం ఫ్రెండు గౌత‌మ్ కిచ్లుని పెళ్లాడిన సంగ‌తి తెలిసిందే. ఇప్ప‌టికే పెళ్లికి ముందు సంత‌కాలు చేసిన సినిమాల‌ను పూర్తి చేస్తోంది. త‌దుప‌రి సంత‌కం చేయాల‌నుకున్న చాలా ప్రాజెక్టుల‌ను ఒక్కొక్క‌టిగా వ‌దులుకోవ‌డం చ‌ర్చ‌కు వ‌చ్చింది.

కాజల్ అగర్వాల్ ప్ర‌స్తుతం గర్భవతి. తన మొదటి బిడ్డ కోసం ఎదురుచూస్తోంద‌ని క‌థ‌నాలొస్తున్నాయి. అందువలన ఆమె తన ప్రాజెక్ట్ ల నుండి వైదొలిగింది. కాజ‌ల్ ప్ర‌స్తుతం కొత్త సినిమాలకు సంత‌కం చేయడం లేదు. తాజా కోలీవుడ్ నివేదికల ప్రకారం.. హన్సిక మోత్వానీ త‌దుప‌రి తమిళ చిత్రం రౌడీ బేబీలో న‌టించ‌నుంద‌ని తెలిసింది. నిజానికి ఈ సినిమాలో తొలి ఆప్ష‌న్ కాజ‌ల్. కాగా త‌ను త‌ప్పుకోవ‌డంతో హ‌న్సిక‌తో చిత్ర‌బృందం రీప్లేస్ చేసింది. జెఎం శరవణన్ ఈ చిత్రానికి ద‌ర్శ‌కుడు. ఇందులో ఇతర ప్రముఖ పాత్రల్లో సోనియా అగర్వాల్- రాయ్ లక్ష్మి-మీనా త‌దిత‌రులు నటించారు. ర‌మేష్ పిళ్లై నిర్మాత‌.

కాజ‌ల్ న‌టించిన ఆచార్య సంక్రాంతి బ‌రిలో విడుద‌ల కానుంది. అలాగే నాగార్జున - ప్ర‌వీణ్ స‌త్తారు ప్రాజెక్ట్ నుంచి కాజ‌ల్ అగ‌ర్వాల్ వైదొల‌గింద‌ని క‌థ‌నాలొచ్చిన సంగ‌తి తెలిసిందే. భార‌తీయుడు 2 చిత్రీక‌ర‌ణ‌ ప్ర‌స్తుతానికి పెండింగ్ లో ఉంది.