సీక్రెట్ గా పెళ్లిపీటలెక్కిన టాప్ సింగర్!

అమెరికన్ పాప్ సింగర్ అరియానా గ్రాండే.. సీక్రెట్ గా పెళ్లి చేసుకున్నారు. ప్రత్యేకమైన కారణం ఏదైనా ఉందో.. కొవిడ్ ప‌రిస్థితులో తెలియ‌దుగానీ ఎవ‌రికీ చెప్ప‌కుండా పెళ్లి చేసుకుంది. కాలిఫోర్నియాలోని త‌న నివాసంలో అతి కొద్ది మంది బంధుమిత్రుల‌తో పెళ్లి తంతు ముగించింది. ఆ త‌ర్వాత‌.. సోష‌ల్ మీడియా వేదిక‌గా ఈ విష‌యాన్ని వెల్ల‌డించింది. దీంతో.. అంద‌రూ అవాక్కైపోయారు.

వాస్త‌వానికి అరియానా గ్రాండే, త‌న ప్రియుడు డాల్ట‌న్ గోమేజ్ ఇద్ద‌రూ పెళ్లి చేసుకోబోయే సంగ‌తి అంద‌రికీ తెలిసిందే. వీళ్లిద్ద‌రూ గతంలోనే ఎంగేజ్ మెంట్ చేసుకున్నారు. గ‌త డిసెంబ‌ర్ లో ముగించిన ఈ వేడుక‌ను ఘ‌నంగా జ‌రుపుకున్నారు. కానీ.. పెళ్లి మాత్రం ఎవ్వ‌రికీ చెప్ప‌కుండా చేసుకున్నారు!

ఈ పెళ్లికి కేవ‌లం 20 మందిని మాత్ర‌మే ఆహ్వానించిన‌ట్టు తెలుస్తోంది. ఇక‌, వీరి వివాహానికి ముందే అమెరికాలో ఓ హై క్లాస్ బంగ్లాను కొనుగోలు చేశారు. ఇక‌, కొత్త జీవితాన్ని సంతోషంగా ఆ ఇంట్లో మొద‌లు పెట్టబోతున్నారు. సోష‌ల్ మీడియాలో ఈ అమ్మ‌డికి ఏకంగా 253 మిలియ‌న్ల మంది ఫాలోవ‌ర్లు ఉన్నారు. వీరి శుభాకాంక్ష‌లు వెల్లువ‌లో త‌డిసి ముద్ద‌వుతోందీ కొత్త జంట‌.