ట్రైలర్ టాక్ః టచ్ చేసి మాస్ ను చూడు

మాస్ రాజా హీరోగా ఈ మధ్యన సినిమాలు రావడం చాలా లేటవుతోంది అనుకుంటున్న సమయంలో.. మనోడు వరుసగా సినిమాలను చేయాలని ఫిక్సయ్యాడట. అందుకే ఇంకా రాజా ది గ్రేట్ సినిమాను మర్చిపోకముందే.. ఇప్పుడు ''టచ్ చేసి చూడు'' అంటూ వచ్చేస్తున్నాడు. రేపు రిపబ్లిక్ డే సందర్భంగా ఈరోజు సదరు సినిమా ట్రైలర్ రిలీజైంది. పదండి ఎలా ఉందో చూద్దాం.

యునిఫామ్ వేసుకోకుండా సింపుల్ గా కాలం గడిపేసే రవితేజ.. అసలు ఒంటిమీద యునిఫామ్ ఉంటే ఏమవుతుంది.. లేకపోతే ఏమవుతుంది అనే తేడాను బాగానే చూపించాడు. ఒక ప్రక్కన రాశి ఖన్నాతో ప్రేమలో పడే చలాకీ ప్రియుడుగా.. మరో ప్రక్కన ఏ కేసునైనా క్షణాల్లో సాల్వ్ చేసే పోలీస్ అధికారిగా మెప్పించాడు. స్టోరీ పరంగా చెప్పుకోవడానికి పెద్దగా ప్లస్ పాయింట్లు ఏమీ లేకపోయినా.. కొత్త దర్శకుడు విక్రమ్ సిరికొండ రవితేజను మరోసారి పవర్ ఫుల్ గా చూపించిన విధానం చాలా బాగుంది. అలాగే కామెడీ నుండి యాక్షన్ వరకు.. పంచుల నుండి సెటైర్ల వరకు.. అన్నింటా రవితేజ తన మార్కు మళ్ళీ చూపించాడు. హీరోయిన్లు రాశి ఖన్నా అలాగే సీరత్ కపూర్ గ్లామర్ పాత్రల్లో మెరిశారని వేరే చెప్పక్కర్లేదు.

గతంలో విక్రమార్కుడు.. పవర్ వంటి కాప్ డ్రామాలతో సక్సెస్ అందుకున్న రవితేజ.. టచ్ చేసి ఇప్పుడు మాస్ ను చూపించి మళ్ళీ హిట్టుకొట్టేలానే ఉన్నాడు. ఇకపోతే ఈ సినిమాకు ప్రీతమ్ నేతృత్వంలోని JAMB అనే గ్రూపు మ్యూజిక్ అందించింది. విన్నంతవరకు వారి వర్క్ యావరేజ్ గానే ఉంది. ఇక చోటా కె నాయుడు అందించిన విజువల్స్ బాగున్నాయి. సినిమా రిలీజ్ డేట్ త్వరలో ప్రకటిస్తారట.