ట్రైల‌ర్ టాక్: లెజెండ‌రీల మ‌ధ్య పోటాపోటీ

దివంగ‌త బాలీవుడ్ లెజెండ‌రీ న‌టుడు రిషీక‌పూర్ ప్ర‌ధాన పాత్ర‌లో హితేష్ భాటియా ద‌ర్శ‌క‌త్వంలో 'శ‌ర్మాజీ కి న‌మ్ కీన్' అనే చిత్రం ప్రారంభ‌మైన సంగ‌తి తెలిసిందే. అయితే ఈ సినిమాలో రిషీక‌పూర్ పై కొన్ని కీల‌క స‌న్నివేశాల చిత్రీక‌ర‌ణ అనంత‌రం షూటింగ్ మ‌ధ్య‌లో రిషీక‌పూర్ హ‌ఠాన్మ‌ర‌ణం చెందారు. దీంతో ఆ పాత్ర‌ని పూర్తి చేయ‌డానికి మ‌రో లెజెండ‌రీ న‌టుడు ప‌రేష్ రావ‌ల్ ని అదే పాత్ర‌లో కి దించారు. ప‌రేష్ ఎంట్రీ తో ఎట్ట‌కేల‌కు ఎలాగూ సినిమా చిత్రీక‌ర‌ణ పూర్తిచేసారు.

బాలీవుడ్ చ‌ల‌న చిత్ర ప‌రిశ్ర‌మ‌లోనే ఒకే పాత్ర‌లో ఇద్ద‌రు న‌టించ‌డం ఇదే తొలిసారి కావ‌డం విశేషం. అన్ని ప‌నులు పూర్తిచేసుకుని ఈనెల మార్చి 31న అమెజాన్ ప్రైమ్ లో రిలీజ్ అవుతుంది. ఈ సంద‌ర్భంగా యూనిట్ ప్ర‌చారం ప‌నులు మొద‌లు పెట్టింది. దీనిలో భాగంగా కొద్ది సేప‌టి క్రిత‌మే సినిమా ట్రైల‌ర్ ని రిలీజ్ చేసారు.

ట్రైల‌ర్ ఆద్యంతం ఆక‌ట్టుకుంటుంది. శ‌ర్మ ప‌దవి విర‌మ‌ణ పొందిన త‌ర్వాత ఇంట్లో ఖాళీగా కూర్చుంటాడు. ఖాళీ స‌మ‌యంలో విసుగుచెందిన శ‌ర్మ‌జీ త‌న కిష్ట‌మైన వంట‌ప‌నిలోకి దిగుతాడు. ఓ ఫాస్ట్ పుడ్ సెంట‌ర్ ని తెర‌వాల‌నుకుంటాడు. కానీ శ‌ర్మ‌జీ త‌న‌యుడు అందుకు ఒప్పుకోడు. వంట‌ప‌ని క‌న్నా.. యోగా.. జుంబా ట్రై చేయమని లేదా డ్రైవింగ్ క్లాసులు తీసుకోవాలని అతని కొడుకు కోరుతాడు. కానీ శ‌ర్మ అందుకు ఒప్పుకోడు. త‌న‌కిష్ట‌మైన వంట ప‌నే చేస్తానంటాడు.

అలా వంట ప్ర‌య‌త్నాల్లో ఉన్న శ‌ర్మ జీ ఓ లేడీ గ్యాంగ్ కిట్టీ పార్టీకి కుక్ గా మార‌తాడు. అక్క‌డే శ‌ర్మ కి జుహీచావ్లా ప‌రిచ‌య‌మ‌వుతుంది. అంత వ‌ర‌కూ సాపీగా సాగిపోయిన శ‌ర్మ జీవితంలో కొత్త మ‌లుపులు మొద‌ల‌వుతాయి. ఈ సంద‌ర్భంలో తండ్రీ-కుమారుల మ‌ధ్య ఎమోష‌న్ హైలైట్ అయింది. కొన్ని స‌న్నివేశాలు ఆద్యంతం హిలేరియ‌స్ ఎంట‌ర్ టైన‌ర్ క‌నిపిస్తుంది. బీజీఎమ్ ఫ‌న్ ఎమోష‌న్ ని క్యారీ చేయ‌గ‌ల్గింది. రిషీక‌పూర్ పాత్ర‌లో ఒదిగిపోయేలా..ఆ గెట‌ప్ లో లో మ్యాచ్ అయ్యేలా ప‌రేష్ రావ‌ల్ ని సిద్దం చేసిన‌ట్లు ట్రైల‌ర్ చూస్తే తెలుస్తుంది.

కొన్ని సీన్ల‌లో రిషీక‌పూర్ ని- మరికొన్ని స‌న్నివేశాల్లో ప‌రేష్ రావ‌ల్ ని తెర‌పై చూడ‌టం కొత్త అనుభూతినిస్తుంది అన‌డంలో ఎలాంటి సందేహం లేదు. ఒకే పాత్ర‌లో ఇద్ద‌రు ఒదిగిపోయారు. ట్రైల‌ర్ వ‌ర‌కూ పాస్ అయ్యారు. మ‌రి ఫుల్ ర‌న్ లో ఆ పాత్ర‌ల మ‌ధ్య వ్య‌త్యాసం ఎలా ఉంటుంద‌న్న‌ది? తెలుస్తుంది. ట్రైల‌ర్ పై అభిమానులు త‌మ‌దైన శైలిలో కామెంట్లు గుప్ప‌తిస్తున్నారు.

ఒకే పాత్ర‌లో ఇద్ద‌రు లెజెండ‌రీల‌ను చూసి అభిమానులు ఆనందం వ్యక్తం చేశారు. "ట్రైలర్‌లో రిషి సర్‌ని చూడటం చాలా బాధగా మరియు సంతోషంగా ఉంది" అని ఒకరు రాశారు. "ఒక ఫ్రేమ్‌లో ఇద్దరు లెజెండ్‌లు" అని మరొకరు రాయ‌గా... పరేష్ - రిషి ఎప్పుడూ ఒకే ఫ్రేమ్‌ను పంచుకోలేర‌ని మ‌రికొంత మంది అభిప్రాయ‌ప‌డ్డారు. ఇంకా ఈ చిత్రంలో సుహైల్ నయ్యర్.. తరుక్ రైనా..సతీష్ కౌశిక్.. షీబా చద్దా ఇషా తల్వార్ త‌దిత‌రులు నటించారు.