ట్రైలర్ టాక్: ఆసక్తి కలిగిస్తున్న 'అలాంటి సిత్రాలు'

డైరెక్టర్ పూరీ జగన్నాథ్ వద్ద రచనా విభాగంలో పనిచేసిన సుప్రీత్ సి. కృష్ణ కొత్త నటీనటులతో తెరకెక్కిస్తున్న సినిమా ''అలాంటి సిత్రాలు''. కె రాఘవేంద్రరెడ్డి సమర్పణలో ఐ &ఐ ఆర్ట్స్ మరియు కాస్మిక్ రే ప్రొడక్షన్స్ బ్యానర్స్ పై శ్రీ వరుణ్ - రాహుల్ రెడ్డి ఈ చిత్రాన్ని నిర్మిస్తున్నారు. ఇప్పటికే విడుదలైన ఈ రొమాంటిక్ డ్రామా ఫస్ట్ లుక్ - టీజర్ సినిమాపై ఆసక్తిని కలిగించాయి. ఈ క్రమంలో తాజాగా “అలాంటి సిత్రాలు” ట్రైలర్ ను చిత్ర యూనిట్ విడుదల చేశారు.

ట్రైలర్ చూస్తుంటే విభిన్న మనస్తత్వాలు కలిగిన నలుగురు వ్యక్తులు అనుకోకుండా ఒకరి దారిలో మరొకరు కలిసినప్పుడు వారి జీవిత గమనంలో చోటుచేసుకున్న అనూహ్య పరిణామాలే ఈ సినిమా అని తెలుస్తోంది. చిన్న సినిమా అయినప్పటికీ ఈ ట్రైలర్ తో కంటెంట్ విషయంలో పెద్ద చిత్రమని అర్థం అవుతోంది. 'మనం బ్రతకడానికి ఏ పని చేసినా తప్పులేదు.. ఇది తప్పు అని చెప్పడానికి ఇక్కడ ఎవరూ కరెక్ట్ కాదు.. ఎవడి వ్యభిచారం వాడు చేస్తున్నాడు' వంటి డైలాగ్స్ ఆకట్టుకుంటున్నాయి. ఈ కథకు మెట్రో ట్రైన్ లో జర్నీకి లింక్ చేస్తూ కథనం ఉన్నట్లు తెలుస్తోంది.

బోల్డ్ సన్నివేశాలు - భావోద్వేగాలతో నిండిన ఈ ట్రైలర్ సినిమాపై ఆసక్తిని రెట్టింపు చేస్తోంది. 'అలాంటి సిత్రాలు' చిత్రానికి సంతు ఓంకార్ సంగీతం అందించగా.. కార్తీక్ సాయి కుమార్ కెమెరామెన్ గా వ్యవహరించాడు. అస్వంత్ శివ కుమార్ ఎడిటింగ్ వర్క్ చేస్తున్నాడు. శ్వేతా పరాశర్ - యాష్ పురి - అజయ్ కతుర్వార్ - ప్రవీణ్ యండమూరి - తన్వీ ఆకాంక్ష - రవి వర్మ - దయానంద్ రెడ్డి ఈ చిత్రంలో ప్రధాన పాత్రలు పోషిస్తున్నారు. త్వరలోనే ఈ సినిమాని ప్రేక్షకుల ముందుకు తీసుకురానున్నారు.