అప్పుడే లేడీ సూపర్ స్టార్ ఏంటండీ...

లేడీ సూపర్ స్టార్.. ఈ పేరు వినగానే తెలుగు ప్రేక్షకులకు ఎవరికైనా సరే విజయశాంతి గుర్తుకు రావాల్సిందే. లేడీ పోలీస్ గెటప్ లోనూ, లేడీ ఓరియెంటెడ్ మూవీస్ తోనూ ఆ రేంజ్ లో టాలీవుడ్ ని ఊపేశారు విజయశాంతి. ఇక్కడే కాదు.. తమిళనాట కూడా విజయశాంతి అంటే సంచలనమే. తెలుగులో ఘరానామొగుడు అంటూ వచ్చిన మూవీలో నగ్మా పాత్రను తమిళ్ లో విజయశాంతి చేశారు. రజినీకాంత్ కి పోటీగా నిలబడ్డంలో విజయశాంతి అద్భుతంగా నటించారు. ఆమె తర్వాత లేడీ సూపర్ స్టార్ బిరుదుకు ఎవరూ పోటీ పడలేకపోయారు.

ఇఫ్పుడు ఆ బిరుదుకు చెన్నై సుందరి త్రిష తగిన జోడీ అంటున్నారు. విజయశాంతి రేంజ్ లో మహిళా ప్రాధాన్యమున్న కేరక్టర్లలో చేయకపోయినా.. ఈ బ్లాక్ బ్యూటీ ఖాతాలో సినిమాలు చాలానే ఉన్నాయి. ప్రస్తుతం ఈమె నటిస్తున్న 50వ చిత్రం సెట్స్ పై ఉంది. రీసెంట్ టైంలో ఇన్ని మూవీస్ చేసిన హీరోయిన్ ని అంజనం వేసినా వెతికినా వెదకడం కష్టం. ప్రస్తుతం కమల్ హాసన్ తో కలిసి నటిస్తున్న చీకటి రాజ్యం... త్రిషకు హాఫ్ సెంచరీ మూవీ.

త్రిషకు లేడీ సూపర్ స్టార్ అనే బిరుదు ఇవ్వాలని ఆమెతో మూవీ చేస్తున్న నిర్మాతలు భావిస్తున్నారు. వినడానికి బాగానే ఉన్నా.. ఈ టైటిల్ కి న్యాయం చేయడం నిలబెట్టుకోవడం చాలా కష్టమైన విషయం. ఒకవేళ ఆమె ప్రధాన పాత్రలో నటిస్తున్న నాయకి హిట్ అయి, సంచలనం సృష్టిస్తే.. అప్పుడేమన్నా ట్రై చేయచ్చేమో కానీ.. అంతకు ముందే ఇచ్చేస్తే మాత్రం.. విజయశాంతి వీరాభిమానులు ఫీలవుతారు.