త్రిషా.. చంపేశావ్ పో!

త్రిష కొత్త సినిమా పోస్టర్లు అటు తమిళం, ఇటు తెలుగు ఇండస్ట్రీల దృష్టిని ఇన్ స్టంట్ గా ఆకర్షించేశాయి. రాజమౌళి సైతం ఈ పోస్టర్ల గురించి గొప్పగా మాట్లాడాడంటే అవి ఎంత ఎఫెక్టివ్ గా ఉన్నాయో ప్రత్యేకంగా చెప్పాల్సిన పని లేదు. గత నాలుగైదేళ్లలో త్రిష నటించిన ఏ సినిమాల్లోనూ అంత ఆకర్షణీయంగా కనిపించలేదు. కానీ ‘నాయకి’ సినిమా గెటప్ లో మాత్రం త్రిష పిచ్చెక్కించేసింది. చీరకట్టులో అందంగా ముస్తాబైన త్రిష.. ఓ చేతిలో గుడికి పట్టుకెళ్లే పళ్లెంతో మరో చేతిలో మాంసం నరికే కత్తితో చాలా విచిత్రంగా కనిపిస్తోంది. ఈ పోస్టర్ గా చూస్తుంటే అందంతో వల వేసి హత్యలు చేసే అమ్మాయి పాత్రలో త్రిష నటిస్తున్నట్లు తెలుస్తోంది. ఇదో హార్రర్ కామెడీ అని ప్రారంభోత్సవం సందర్భంగా త్రిష వెల్లడించింది.

ఈ సినిమా విశేషాల గురించి త్రిష వివరిస్తూ.. ‘‘హైదరాబాద్ లో ఓ సినిమా షూటింగ్ లో ఉండగా దర్శకుడు గోవి వచ్చి నాయకి సినిమా కథ చెప్పారు. చెప్పడం మొదలుపెట్టిన ఐదు నిమిషాలకే నాకు కథ బాగా నచ్చేసింది. సినిమా చేయాలని మెంటల్ గా ఫిక్స్ అయిపోయా. కానీ ఎంతో ఆత్రంగా గోవి కథ చెబుతున్న తీరు చూసి ఆయనకు అడ్డుపడదలుచుకోలేదు. దాదాపు గంట పాటు ఆయన స్క్రిప్ట్ వివరంగా చెబుతుంటే ఆసక్తిగా విన్నా. నేను పోషిస్తున్న పాత్ర చాలా భిన్నంగా ఉంటుంది. ఇలాంటి పాత్ర ఇంతకుముందెన్నడూ చేయలేదు. హార్రర్ కామెడీ జానర్ లో గతంలో చాలా సినిమాలొచ్చాయి. మా సినిమా కూడా ఆ జానరే కానీ.. ఈ కథ జరిగే కాలం, ఆ నేపథ్యం చాలా డిఫరెంట్ గా ఉంటాయి. నా కెరీర్ లో ఈ సినిమా ఓ మైలురాయి అవుతుంది’’ అని త్రిష చెప్పింది. ఇంతకుముందు తెలుగులో లవ్ యు బంగారం అనే రొమాంటిక్ సినిమా తీసిన గోవి.. ‘నాయకి’ని తెలుగు తమిళ భాషల్లో రూపొందిస్తున్నాడు.