పవర్ స్టార్ సినిమాలో హీరోయిన్ గా త్రిష..?

క‌న్న‌డ కంఠీరవ రాజ్ కుమార్ తనయుడు పవర్ స్టార్ పునీత్ రాజ్ కుమార్ 'యువరత్న' అనే డబ్బింగ్ సినిమాతో తెలుగు ప్రేక్షకులను ఆకట్టుకున్నారు. దీంతో ఇకపై ఆయన నటించే ప్రతీ చిత్రాన్ని తెలుగులోనూ విడుదల చేయాలని చూస్తున్నారు. ప్రస్తుతం పునీత్ హీరోగా తెరకెక్కనున్న ''ద్విత్వ'' (DVITVA) చిత్రాన్ని పాన్ ఇండియా స్థాయిలో రిలీజ్ చేయనున్నారు. ఇటీవలే ఈ చిత్రానికి సంబంధించిన అధికారిక ప్రకటన వచ్చింది.

'లూసియా' 'యూ టర్న్' వంటి డిఫరెంట్ మూవీస్ ని అందించిన పవన్ కుమార్ 'ద్విత్వ' చిత్రానికి దర్శకత్వం వహిస్తున్నారు. ఈ చిత్రంలో నటించే హీరోయిన్ గురించి ఓ న్యూస్ ఫిలిం సర్కిల్స్ లో చక్కర్లు కొడుతోంది. ఇందులో క‌న్న‌డ ప‌వ‌ర్ స్టార్ పునీత్ రాజ్ కుమార్ సరసన త్రిష హీరోయిన్ గా నటిస్తోందని అంటున్నారు. త్రిష ఇంతకముందు పునీత్ తో కలిసి 'పవర్' అనే చిత్రంలో నటించింది. ఇది తెలుగులో బ్లాక్ బస్టర్ అయిన 'దూకుడు' చిత్రానికి అధికారిక కన్నడ రీమేక్.

ఈ క్రమంలో ఇప్పుడు 'ద్విత్వ' సినిమాతో త్రిష మరోసారి పునీత్ తో జోడీ కట్టనుందని టాక్ వినిపిస్తోంది. ఇందులో నిజమెంతో తెలియాలంటే అధికారిక ప్రకటన వచ్చే వరకు వేచి చూడాల్సిందే. ఇకపోతే త్రిష ప్రస్తుతం నాలుగు తమిళ సినిమాలతో పాటుగా ఒక మలయాళ చిత్రం చేస్తోంది. అంతేకాదు సూపర్ స్టార్ మహేష్ బాబు - త్రివిక్రమ్ శ్రీనివాస్ కాంబినేషన్ లో తెరకెక్కుతున్న '#SSMB28' ప్రాజెక్ట్ లో కూడా త్రిష నటించనున్నారని టాక్ నడుస్తోంది.

కాగా, ''ద్విత్వ'' చిత్రాన్ని హోంబలే ఫిల్మ్స్ బ్యానర్ పై 'కేజీఎఫ్' నిర్మాత విజయ్ కిరగందూర్ భారీ బడ్జెట్ తో నిర్మిస్తున్నారు. ఇది హోంబలే ఫిల్మ్స్ బ్యానర్ లో వస్తున్న తొమ్మిదవ సినిమా.. 'యువరత్న' తర్వాత ఈ ప్రొడక్షన్ హౌస్ లో పునీత్ నటిస్తున్న రెండో సినిమా. పవన్ కుమార్ ఈ చిత్రాన్ని ఒక సైకాలజికల్ థ్రిల్లర్ డ్రామాగా రూపొందిస్తున్నారని సమాచారం.

''ద్విత్వ'' చిత్రంలో పునీత్ డిఫరెంట్ గెటప్ లో కనిపించబోతున్నారు. పూర్ణ చంద్ర తేజస్వి ఈ చిత్రానికి సంగీతం సమకూరుస్తుండగా.. ప్రీత జయరామన్ సినిమాటోగ్రఫీ అందించనున్నారు. సెప్టెంబర్ నుంచి ఈ సినిమా రెగ్యులర్ షూటింగ్ ప్రారంభం కానుంది. దీనికి సంబంధించిన ఇతర నటీనటులు సాంకేతిక నిపుణుల వివరాలు త్వరలో వెల్లడి కానున్నాయి.