త్రిషకు కిక్ యాస్ స్క్రిప్టు కావలెను

హీరోయిన్ గా కెరీర్ ఆరంభించిన మొదట్లో తమిళంతో పాటు తెలుగులోనూ హవా సాగించింది త్రిష. ‘వర్షం’.. ‘నువ్వొస్తానంటే నేనొద్దంటానా’ లాంటి సినిమాలతో చాలా వేగంగా ఇక్కడ స్టార్ ఇమేజ్ సంపాదించింది. ఒక ఐదారేళ్ల పాటు టాలీవుడ్లో జోరు చూపించింది. ఇక్కడి స్టార్ హీరోలందరితోనూ జత కట్టింది. కానీ ఉన్నట్లుండి ఆమెకు ఇక్కడ అవకాశాలు తగ్గిపోయాయి. ఆమె గ్లామర్ దెబ్బ తినడం.. వరుస ఫ్లాపులు ఎదురు కావడం దానికి కారణం. ఒక దశలో త్రిషకు ఇక్కడ పూర్తిగా అవకాశాలు ఆగిపోయాయి. ఇక ఆమె మళ్లీ తెలుగు తెర పై కనిపించడం కష్టమే అనుకున్నారంతా. అలాంటి సమయంలో ‘దమ్ము’.. ‘లయన్’ లాంటి ఒకటీ అరా అవకాశాలు వచ్చినా అవేమీ ఆమెకు కలిసి రాలేదు. లేడీ ఓరియెంటెడ్ మూవీ ‘నాయకి’ సినిమాతో ఆమె టాలీవుడ్ కెరీర్ కు దాదాపుగా తెరపడిపోయింది.

ఇప్పుడు త్రిషను తెలుగులో పట్టించుకునే నాథుడు లేడు. కానీ తమిళంలో మాత్రం ఇప్పటికీ ఆమెకు అవకాశాలు అందుతున్నాయి. ప్రస్తుతం ఆమె అరడజను సినిమాలు చేస్తుండటం విశేషం. ఇటీవలే 15 ఏళ్ల కెరీర్ పూర్తి చేసుకున్న నేపథ్యంలో త్రిష అభిమానులతో చిట్ చాట్ చేసింది. ఈ సందర్భంగా తెలుగులో మళ్లీ ఎప్పుడు సినిమాలు చేస్తారంటూ ఓ అభిమాని అడిగితే.. ‘‘కిక్ యాస్ స్క్రిప్టు ఎప్పుడు దొరికితే అప్పుడు’’ అని బదులిచ్చింది త్రిష. కానీ స్క్రిప్టును బట్టి తెలుగులో సినిమాలు ఎంచుకునేంత సీన్ త్రిషకు లేదిప్పుడు. తెలుగులో చాలావరకు గ్లామర్ క్యారెక్టర్లే చేసింది త్రిష. ఇప్పుడేమో స్క్రిప్టు.. క్యారెక్టర్ అంటూ కబుర్లు చెబుతోంది. అవకాశాలు తగ్గిన ప్రతి స్టార్ హీరోయిన్ చెప్పే మాటలే ఇవి. ఈ విషయంలో ఒక సామెతను కూడా గుర్తు చేసుకోవాల్సిందే.