సమ్మర్ కే సెటిలయ్యా అంటున్న త్రిష

ఈ వేసవి ప్రారంభం నుంచి భారీ చిత్రాల హంగామానే కనిపిస్తోంది. ముఖ్యంగా టాలీవుడ్ లో ఈ సందడి మరీ ఎక్కువగా ఉంది. సర్దార్ తో మొదలైన హడావిడి, సరైనోడు, 24, బ్రహ్మోత్సవంలతో పీక్ స్టేజ్ కి వెళ్లిపోయింది. ఇంకా ఈ సమ్మర్ త్రివిక్రమ్ మూవీ అ..ఆ.. విడుదల కావాల్సి ఉంది. వరుసగా భారీ చిత్రాలు క్యూ కట్టేయడంతో.. చిన్న సినిమాలు సమ్మర్ ని ఉపయోగించుకోలేకపోయాయి.

చెన్నై బ్యూటీ త్రిష మాత్రం సమ్మర్ కే సెటిల్ అవ్వాలని చూస్తోంది. ప్రస్తుతం ఈ సీనియర్ సుందరాంగి నటించిన హారర్ కామెడీ మూవీ 'నాయకి' రిలీజ్ కు సిద్ధంగా ఉంది. సరైన డేట్ కోసం ఎదురుచూస్తున్న త్రిష.. ఇప్పుడు సమ్మర్ చివర్లోనే మూవీని విడుదల చేయాల్సిందిగా నిర్మాతలకు సూచించిందట. ఇప్పటివరకూ అందుతున్న సమాచారం ప్రకారం.. జూన్ 10న నాయకిని విడుదల చేసేందుకు ప్లాన్ చేస్తున్నారని తెలుస్తోంది.

కెరీర్ లో కీలక దశకు చేరుకున్న త్రిషకు.. నాయకి హిట్ అవడం చాలా ముఖ్యం. హీరోయిన్ ఆఫర్స్ తగ్గిపోయిన సమయంలో.. లేడీ ఓరియెంటెడ్ చిత్రాలతో కాలం గడిపేందుకు నాయకి హెల్ప్ అవుతుందని అమ్మడి ఆశ. ఇదంతా జరగాలంటే.. నాయకి మూవీ హిట్ కావడం చాలా ముఖ్యం. తెలుగు, తమిళ్ లో తెరకెక్కిన నాయకిపై.. అందరికంటే ఎక్కువగా త్రిషనే ఆశలు పెట్టుకుంది.