లైంగిక వేధింపులపై త్రిష పోరాటం

చెన్నై బ్యూటీ త్రిష ఇప్పుడిప్పుడే మళ్లీ పబ్లిక్ లోకి వచ్చేస్తోంది. అప్పట్లో పెటా సంస్థకు సపోర్ట్ చేయడం.. జల్లికట్టుకు వ్యతిరేకంగా ట్వీట్ పెట్టడంతో.. విపరీతమైన వ్యతిరేకతకు గురి కావాల్సి వచ్చింది. ఈ ప్రభావంతో త్రిష నటించిన సినిమాల షూటింగ్ కూడా ఆలస్యమైంది. మళ్లీ ఇప్పుడు పరిస్థితులు ప్రశాంతించడంతో.. త్రిష నటించే సినిమా పనులు మొదలైపోయాయి.

ప్రస్తుతం గర్జనై అనే మూవీ షూటింగ్ ను శరవేగంగా షూట్ చేసేస్తోంది త్రిష. ఈ సినిమా మహిళలపై వేధింపులకు వ్యతిరేకంగా ఉంటుందట. ఐదుగురు కుర్రాళ్లు.. ఓ గ్రూప్ గా ఏర్పడి మహిళలను లైంగికంగా వేధించడం.. ఆయా దృశ్యాలను కెమేరాల్లో బంధించి.. సోషల్ మీడియాలో విక్రయించడం చేస్తుంటారట. అలాగే తమను ప్రేమించడానికి నిరాకరించిన యువతులుపై సామూహికంగా అత్యాచారానికి ఒడికట్టే ఆ గ్రూప్ పై.. త్రిష చేసే పోరాటమే గర్జనై చిత్ర కథ అని తెలుస్తోంది.

ఇది కంప్లీట్ యాక్షన్ జోనర్ లో తెరకెక్కుతుండగా.. గర్జనైలో ప్రతీ సన్నివేశాన్నీ డూప్ కూడా లేకుండా స్వయంగా చేసేస్తోందిట త్రిష. ఈ మూవీలో త్రిష యాక్షన్ యాంగిల్ ని చూసే భాగ్యం ప్రేక్షకులకు దక్కనుందన్న మాట. మొదట గ్లామర్ పాత్రలకే పరిమితమైన త్రిషకు.. కెరీర్ చివరి దశలో అన్ని రకాల యాంగిల్స్ ఉన్న రోల్స్ వస్తుండడం విశేషం.

Like Us on Facebook : https://www.facebook.com/Tupakidotcom/