త్రిష ఎవరితో నటిస్తోందో తెలుసా..?

నాలుగైదేళ్ల కిందటే త్రిష కెరీర్ చరమాంకానికి వచ్చేసినట్లుగా అనిపించింది. ఎంత వేగంగా స్టార్ డమ్ సంపాదించిందో అంతే వేగంగా స్టార్ డమ్ కోల్పోయి.. అవకాశాల్లేక సినిమాలకు గుడ్ బై చెప్పేసేలా కనిపించింది త్రిష. కానీ రెండేళ్ల కిందట ఉన్నట్లుండి ఆమె కెరీర్ మళ్లీ మలుపు తిరిగింది. వరుసగా అవకాశాలు అందుకుని.. బిజీ అయిపోయింది. ఇటీవలే విడుదలైన ధనుష్ సినిమా ‘కొడి’ (తెలుగులో ధర్మయోగి)లో త్రిష పెర్ఫామెన్స్ చూసి అందరూ విస్తుపోయారు. ప్రస్తుతం ఆమె రజినీకాంత్.. పవన్ కళ్యాణ్ సినిమాలకు కన్సిడరేషన్లో ఉన్నట్లుగా వార్తలొస్తున్నాయి. వాటి కంటే ముందు త్రిష ఒక బంపర్ ఆఫర్ పట్టేసింది.

మలయాళంలో స్టార్ హీరోగా ఎదిగిన సెన్సేషనల్ హీరో నివిన్ పౌలీ సరసన ఆమె నటించబోతోంది. శ్యామ్ ప్రసాద్ అనే దర్శకుడితో వీళ్లిద్దరి కాంబినేషన్లో ఓ సినిమా రాబోతోంది. విశేషం ఏంటంటే.. దాదాపు దశాబ్దంన్నరగా కథానాయికగా కొనసాగుతున్న త్రిష.. మలయాళంలో నటించబోతున్న తొలి సినిమా ఇదే. మరో విశేషం ఏంటంటే.. త్రిష కన్నా వయసులో.. సినిమా అనుభవంలో నివిన్ చిన్నవాడు. ఈ మధ్యే ‘ప్రేమమ్’ సినిమాకు ఫిలిం ఫేర్ అవార్డు అందుకున్న సందర్భంగా నీ ఫేవరెట్ హీరోయిన్ ఎవరు అంటే.. త్రిష అని బదులిచ్చాడు నివిన్. ఇప్పుడు తన ఫేవరెట్ హీరోయిన్ సరసన నటించబోతున్నాడు. ప్రస్తుత పరిస్థితుల్లో నివిన్ లాంటి క్రేజీ యంగ్ హీరో పక్కన కథానాయికగా చేయడం త్రిషకూ మంచి అవకాశమే.